O Museo do Mar de San Cibrao, en Cervo, amosa na fachada unha selección de fotografías de mulleres coidadoras da artista visual Mar Caldas. Unha iniciativa que pretende poñer os coidados no centro do debate, intervindo no espazo público, e que se complementa cunha mostra dun centenar de retratos da mesma autora no interior do Museo. Trátase de imaxes sobre o papel de coidadoras das mulleres traballadoras, que ou ben teñen que compaxinar ambos roles no seo familiar, ou deben ocuparse dos coidados de persoas alleas para que outras persoas poidan realizar outros traballos.
A exposición inicia unha serie de intervencións artísticas comisariadas por Ánxela Caramés que se desenvolverán na Rede Museística Provincial ao longo da semana, coincidindo co Día Internacional do Patrimonio Mundial – o 16 de novembro –, e que forman parte do proxecto “Coidados, vulnerabilidades e dependencias” organizado pola Fundación Luis Seoane.
