A Deputación inicia as obras de mellora e rehabilitación da estrada provincial LU-P-0406, de Martín a Crende, no concello de Baleira. Serán uns traballos que implican un investimento de preto de 110.000 euros que permitirán a renovación do firme desta vía.
O prazo de execución desta actuación, que se levan a cabo dende o inicio ata o punto quilométrico 5,077, é de 3 meses e comezaron coa limpeza de cunetas. Posteriormente levarase a cabo a reparación dos danos que soporta a vía. O último paso será o asfaltado e pintado da estrada, o que permitirá aumentar a seguridade das persoas usuarias da estrada.
Nesta mesma estrada, a comezos de ano leváronse a cabo obras de urxencia para a reparación do quilómetro 2,700 tras os danos provocados polas choivas. Os traballos tiveron un custo de 130.000 euros e obrigaron a cortar o tráfico para restituír a superficie. Desta forma, no que vai de ano a Deputación de Lugo investiu preto de 250.000€ na mellora desta vía.
