Teatro, música, feira de emprededoras, obradoiros de saberes tradicionais, mesas redondas e ata a elaboración dun graffiti. Son as actividades que os días 2 e 3 de setembro levará ata Navia de Suarna a Caravana Cultural das Mulleres Rurais. Unha iniciativa pioneira de Fademur que nace coa vontade de poñer en valor os saberes, os oficios e a cultura tradicional e de tecer unha rede de mulleres rurais a nivel estatal que permita facer aflorar todo ese patrimonio cultural.
A fin de semana do 2 e 3 de setembro Navia de Suarna converterase en epicentro cultural grazas a un amplo programa de actividades que se desenvolverá tanto en espazos públicos como privados da localidade; e que pretende xerar debates, crear diálogo e visibilizar e poñer en valor a cultura rural e o papel primordial que as mulleres desenvolven e desenvolveron sempre nese eido. Así o destacou a presidenta de Fademur, Teresa López, na presentación do evento realizada este xoves en Lugo. Un acto no tamén participaron a presidenta de Fademur Galicia, Verónica Marcos, e o alcalde de Navia de Suarna, José Fernandez.
A Caravana Cultural das Mulleres Rurais nace dun convenio de colaboración asinado entre Fademur e o Instituto da Muller. Navia de Suarna será a primeira parada dunha iniciativa que se desenvolverá a nivel estatal e que ten como obxectivo poñer en valor tanto o territorio como as persoas que o habitan e, moi especialmente, as mulleres.
Verónica Marcos foi a encargada de debullar un programa que dende a inauguración do festival, o sábado 2 de setembro ás 11:30 da mañá, ata a súa clausura, o domingo 3 pola tarde, ofertará talleres de musicoterapia e de recuperación e transmisión de saberes tradicionais vinculados ao fiado do liño e da lá, ao traballo con coiro, ao tecido, os bolillos
ou á transmisión oral e as pandereteiras. Tamén haberá espazo para unha feira de emprendedoras con degustación na que as mulleres rurais vinculadas a Fademur exporán e terán á venda os seus produtos. A programación complétase con dous concertos das bandas Bulbakán e N.E.X.N. e coa obra de teatro El contrabajo estrellado.
Pola súa banda, o alcalde de Navia de Suarna agradeceu a Fademur a confianza á hora de escoller esta primeira parada do festival e puxo en valor o papel primordial das mulleres no mantemento dun rural vivo. Nese senso, José Fernández destacou o compromiso do Concello coa igualdade e fixo un chamamento para seguir traballando e impulsando iniciativas que permitan seguir avanzando na consecución dun rural vivo, activo e con calidade de vida garantida para todas as persoas que o habitan.
