A Plataforma en Defensa da Sanidade Pública (PLADESAPU) de Monforte vén de amosar a súa indignación ante os últimos acontecementos sucedidos no Hospital Comarcal de Monforte.
Como de todos é sabido, “dende o venres estamos a sufrir as consecuencias das inclemencias meteorolóxicas en forma dunha serie de tormentas bastante aparatosas. Sen embargo, estas consecuencias son máis serias cando nun hospital como é o noso, o mantemento das instalacións non é o axeitado”, din.
Na madrugada do venres ao sábado, debido a tormenta e as malas condicións dun tellado que “leva anos pendente de ser arranxado, producíronse varias inundacións en diferentes partes do hospital (maternidade, hospital de día, laboratorio, plantas de hospitalización, etc.) provocando a movilización de todo o personal que como puido e co que puido intentaban evitar o aumento desas inundacións con sábanas, toallas, fregonas e todo o que atopaban para que non afectase en moita medida aos pacientes ingresados e aos aparellos”.
Dentro das consecuencias máis graves estiveron o traslado de pacientes dunhas habitacións a outras, interrumpindo “o tan beneficioso descanso nocturno do resto de pacientes e incluso, a paralización do traballo de laboratorio para realizar as análises pertinentes coa demora dos resultados solicitados”.
Como membros da plataforma, persoal e usuarios dos servicios deste hospital, “estamos indignados tanto coa dirección do Hospital como da EOXI da que supostamente dependemos, polo pasotismo ante unha problemática que non vén de novo, senon que dende o que moitos recordan, vén de hai moitos anos; xa que o tellado deste edificio leva pendente de arranxarse moito tempo provocando que cada pouco, ante tormentas importantes volvan aparecer inundacións en moitas das zonas deteriorando o mobiliario e provocando incomodidades aos pacientes. O curioso é que estas inundacións tamén afectaron a zonas de recente modificación como o servicio de laboratorio (xuño 2022)”.
