Os concelleiros do Grupo Municipal do PP de Monforte mantiveron un encontro con veciños de Santa Mariña de Monte: “Por desgraza teñen os mesmos problemas que no resto do rural”, sinalaron.
A voceira popular, Katy Varela, criticou o “nulo compromiso” de José Tomé coas parroquias e os seus veciños, xa que nesta zona tamén teñen “serios problemas co abastecemento” derivados da falta dun colector.
Do mesmo xeito, tamén son recorrentes as roturas na rede de abastecemento: “Se ao equipo de goberno lle importase a zona rural terían unha programación anual para dotar dun abastecemento e saneamento en condicións ás parroquias, en lugar de telas abandonadas”, denunciou.
Os veciños de Santa Mariña de Monte tamén se queixaron da situación da estrada principal que percorre a parroquia, de titularidade provincial. “Afirman que está moi ben asfaltada, como así é, pero a realidade é que as cunetas non están limpas polo que non escorre a auga, o que dana o asfalto”, indicou.
Ademais, o local social da parroquia precisa dun arranxo urxente, xa que está en mal estado de conservación na súa parte exterior e, no interior, está cheo de humidades o que podería derivar en problemas de salubridade.