Despois das últimas analíticas realizadas por técnicos do Concello de Foz, veñen de informar que se eliminan as recomendacións de non usar a auga da traída para a inxesta.
“O día 25 de agosto recomendamos por segunda vez neste verán ás veciñas e veciños de Foz non empregar a auga da traída para beber e cociñar”, dixeron, “despois de distintas actuacións na planta potabilizadora, na que se axustou o caudal de potabilización, mellorouse a dosificación de peróxido e iniciouse o tratamento cun floculante que favorece a eliminación da materia orgánica, hoxe podemos asegurar que a auga da traída se pode empregar para calquera uso con total tranquilidade e normalidade”.
Os niveis de trihalometanos en tres analíticas consecutivas de mostras tomadas o pasado venres e o luns e martes desta semana están por debaixo dos 100 microgramos por litro en todos os puntos de mostreo. De feito o valor máis alto na última analítica realizada -a deste martes- é de 57 microgramos por litro.
O alcalde informa que “continuaremos a realizar analíticas cada dous días, para unha mellor seguridade de todas as persoas usuarias”. Segue pendente a instalación de equipos de medición continua e a substitución dos filtros de area por unha arlita que mellorará aínda máis as propiedades da auga, traballos que están á espera de recibir os materiais encargados.
As medidas previstas vanse implantar para maior seguridade e debemos seguir a mellorar a potabilizadora a medio e longo prazo. Traballamos para evitar que episodios coma este se repitan e de novo debo reiterar as desculpas a todas as persoas usuarias.
