A directora xeral de Relacións Laborais, Elena Mancha, clausurou onte a V Xornada Iuslaboralista do Colexio Oficial de Graduados Sociais de Lugo, un acto que aproveitou para destacar a utilidade do servizo gratuíto de orientación xurídico-laboral, que a Consellería de Promoción do Emprego e Igualdade ten ao servizo da cidadanía grazas á colaboración cos tres colexios oficiais de graduados sociais en Galicia (Lugo, Pontevedra e A Coruña e Ourense).
Na xornada destacou que no que vai de 2023, no Colexio de Lugo atendéronse 83 consultas sobre asuntos relacionados coas relacións laborais.
A directora xeral puxo en valor esta iniciativa coa que o Goberno galego está a atender consultas sobre prestacións, contratos, convenios ou salarios, etc. Este servizo gratuíto, incidiu Mancha, asesora tamén sobre cuestións relacionadas co emprendemento e o traballo autónomo e relacionadas coa igualdade laboral e medidas contra a discriminación ou o acoso no lugar de traballo.
Poden acceder a esta orientación xurídico-laboral persoas físicas que non teñan a condición de empresarias e os traballadores autónomos que pretendan iniciarse no emprendemento. Tamén poden utilizar o asesoramento en materia de igualdade, discriminación e acoso, as persoas colexiadas con respecto aos seus despachos, así como os clientes, no caso de requirilo.
O funcionamento do servizo responde a un convenio asinado pola Consellería de Promoción do Emprego e Igualdade cos tres colexios oficiais de graduados sociais que se vén de duplicar este ano: Lugo (10.000 euros), Pontevedra (10.000 euros) e A Coruña-Ourense (10.000 euros).
