Falamos con Jorge Loureiro Vázquez, sarriao de 20 anos que acompaña ao CD Lugo en todos os seus partidos.
De onde vén a súa paixón polo fútbol?
Polo meu pai, que sempre me levaba a ver o fútbol e desde pequeno quixen xogar e entretíñame moito velo.
Xogou algunha vez ao fútbol ou a outro deporte?
Si, xoguei a fútbol, a fútbol sala, a baloncesto, taewkondo e tamén practiquei atletismo.
Por que acompaña a todos os partidos ao CD Lugo?
Sempre me gustou viaxar para ver ao meu equipo, pero o de ir a todos lados só foi desde a tempada pasada, porque de pequeno non podía ir a moitos sitios polo pouco tempo que tiñan os meus pais e economicamente non podían ir, entón propúxenme ir un ano a todos os partidos.
Algúns dirán que apoia ao equipo da cidade, pero non ao de Sarria, por que?
A verdade é que desde pequeno era do Lugo e así seguín.
A SD Sarriana, cal é a súa opinión sobre o fútbol que eles promoven?
Están facendo as cousas moi ben, lograron o ascenso a 3RFEF e crearon a Sarriana B, creo que poden facer cousas interesantes.
Como valora que xogadores do CD Lugo pasasen a ser xogadores da Sarriana?
Pois a min a marcha de Pedro López naquel momento chocoume bastante, xa que xogara co primeiro equipo e tiña moi boa pinta. Sen dúbida, nesa marcha a Sarriana saíu gañando, aínda estando en preferente levaron a un central de moito nivel.
Pola outra banda, a marcha de Julen no persoal doeume, pero creo que aquí na Sarriana pode ter moitas oportunidades. Sen dúbida a Sarriana sobe o nivel do equipo e o Lugo perde dous talentos da casa.
Como é ser afeccionado do CD?
Lévase no sangue.
Como espera que sexa esta tempada?
Espero e desexo que máis ilusionante que a anterior, creo que xuntos podemos lograr o ascenso.
Seguirá viaxando co equipo a todos os partidos?
Vou tentar alongalo o máximo posible e seguir indo a todos, pero a ver ata cando podo, tentarei outra tempada máis, logo xa se verá.
Que é o que máis lle gusta de ir a cada partido?
Coñecer cidades, xente e estadios de fútbol. Lévome, en xeral, moi bos recordos de moitos.
Cre que algunha vez acompañará da mesma forma a un equipo de Sarria?
Non o descarto, pero ao CB Sarria, teño moitos amigos alí, oxalá consigan o ascenso.