Decenas de persoas concentráronse esta mañá diante do centro de saúde do Páramo nunha manifestación convocada polo Bloque Nacionalista Galego de O Páramo con motivo da “continua falta de persoal facultativo que impide a correcta atención primaria da veciñanza”, tal e como anunciou a portavoz do grupo político, Marta Porteiro.
“A veciñanza de O Páramo está farta de que nos quiten servizos e farta de non saber nunca se imos ter facultativos que nos atendan”, explicou a nacionalista. “O Páramo ten unha poboación de 1300 habitantes na que a maioría da poboación está moi envellecida e que, polo tanto, precisa de atención médica continua”.
Segundo Marta Porteiro, “entre baixas médicas e vacacións case non quedan facultativos, e as persoas máis maiores nunca saben o que van atopar ao chegar ao seu centro”. Nesta situación, tan só pasa consulta un profesional catro horas ao día, pero nunca se sabe con exactitude o horario no que vai a estar no centro nin os días.
Así, indicou a portavoz, “resulta imposible que o persoal sanitario poida atender a demanda de pacientes que ten o centro, e estanse a producir cambios de citas que acaban indo a urxencias co risco de saturación que isto pode orixinar”, denunciou Porteiro.
“No día de onte, 25 de outubro, en ningún momento fomos avisados de que non había ningún médico, e hoxe temos dous, tamén sen previo aviso á veciñanza. Todo isto pasa despois de que o Sr. Alcalde saíra na prensa anunciando que tiña un acordo co Sergas para ter facultativos todos os días. Isto o único que demostra é a falla de respecto que a Xunta de Galiza ten pola veciñanza de O Páramo”, explicou Marta Porteiro.
“A atención primaria é a columna vertebral da sanidade pública, e non podemos deixar que nos sigan a recortar este servizo, así que seguiremos a loitar entre todos para que nos restablezan o servizo que debemos ter en O Páramo” concluíu Marta Porteiro.
