Alejandro Losada Rodríguez, ou tamén coñecido como Álex Camba, promotor da Escola de Taekwondo de Sarria, participará do Open G1 de Croacia como profesional do taekwondo.
Segundo Álex, a súa intención é gañar os máximos puntos posibles nestes enfrontamentos e conseguir medallas, xa que quere seguir entre os 131 mellores taekwondistas do mundo na súa categoría e seguir subindo postos de cara ao Campionato Europeo de Taekwondo, que terá lugar a finais de novembro en Austria.
Así, di que competirá na categoría individual sénior 1 e tamén na modalidade por equipos, xunto cos seus compañeiros do equipo Neka Taekwondo de Monforte, xa que no 2021 conseguiron ser Campións de Europa nese mesmo campionato e este ano queren repetir.
Ademais, explica que el, como Campión de España, quere lograr os mesmos resultados individuais que obtivo en 2019, cando conseguiu o bronce no Campionato Europeo, polo que necesita moitos puntos neste Open de Croacia.
