O Campus Terra da USC organiza este luns 13 de novembro, a partir das 16.00 horas, no edificio de apoio á investigación (Cactus) da sede universitaria luguesa, unha xornada de mentorización de investigadores noveis co obxectivo de prestar apoio e asesoramento á mocidade investigadora pre e postdoutoral, así como a aquelas persoas que están a dar os seus primeiros pasos na actividade científica.
Os investigadores ‘Ramón y Cajal’ que están a desenvolver o seu labor nos distintos centros do Campus Terra da USC, César Pérez Cruado, Alba Díaz e Patricia López, serán os encargados de conducir esta sesión de mentorización da mocidade investigadora, unha proposta que tamén está aberta ao conxunto do estudantado universitario de grao e mestrado no Campus Terra, así como a todo o alumnado interesado na actividade investigadora.
O programa, que se prolongará durante tres horas, permitirá aos relatores convidados achegar información sobre as distintas posibilidades e oportunidades para iniciarse no traballo de investigación, ademais de explicar o proceso que require o desenvolvemento dunha traxectoria investigadora nos diversos ámbitos científicos de especialización que abrangue o Campus Terra da USC.
Alén de espertar o fortalecer novas vocacións científicas, a delegada da USC para o Campus Terra, Elvira López Mosquera, agarda que esta xornada sirva para mergullarse no día a día da I+D, pero tamén para compartir experiencias e para coñecer de primeira man as demandas e expectativas das futuras xeracións de científicos.
