Unha vintena de emigrantes ou descendentes de galegos na emigración están participando en Lugo nunha das accións do programa da Xunta Retorna Cualifica Emprego, que lles procurará formación e un contrato de traballo indefinido no sector da hostalería.
O delegado territorial de Lugo, Javier Arias, visitou aos participantes no curso, que xestiona Nortempo e que se desenvolve nas instalacións da Asociación Provincial de Empresarios de Hostalería de Lugo (APEHL); deu comezo a primeira semana de novembro, ten unha duración de 50 horas e a previsión é que se poidan incorporar ao mercado laboral este mesmo mes.
Arias avanzou que a Consellería de Promoción do Emprego e Igualdade manterá este programa no 2024 para atraer talento galego do exterior e cubrir vacantes nas empresas. A iniciativa inclúe unha axuda económica para financiar os gastos iniciais, tanto da viaxe a Galicia coma outros de establecemento na Comunidade.
O Goberno galego ponse en contacto con persoas que queren regresar a Galicia cun contrato estable, conectando perfís profesionais de distintas cualificacións cos sectores produtivos con máis vacantes. Na xestión do programa tamén participa a Fundación Venancio Salcines.