Centos de persoas congregáronse diante do centro de saúde convocadas pola plataforma Chantada quere sanidade para expresar un clamor unánime en favor dunha atención sanitaria pública con calidade asistencia para o que é necesario que Chantada teña o persoal médico e de enfermaría.
No manifesto lido polas persoas voceiras da plataforma, Mari Maciñeiras e Meixide, subliñáronse os continuados recortes, a falta de especialistas no hospital comarcal e os centos de millóns de euros que se levan recortando desde a Xunta “e que explican que hoxe se invista menos que no 2009”.
“As persoas afectadas nos centros de saúde de Chantada e Carballedo non imos permitir que se sigan pondo en risco as nosas vidas, porque os recortes e as políticas de desmantelamento e privatización da sanidade matan. Desde a plataforma continuaremos desenvolvendo accións e dirixíndonos á xerencia na procura de solucións para os nosos centros de saúde mais para o hospital comarcal, cuxa directora debe demitir”, sostiveron desde a plataforma.
Chantada quere sanidade xa está recollendo sinaturas e estudará emprender novas mobilizacións polas rúas da vila até que haxa unha solución satisfactoria para os centros de saúde.