Unha concentración diante da casa consistorial poñía de manifesto a repulsa do Concello de Quiroga contra todo tipo de violencia machista este sábado con motivo do 25N. Co fin de fomentar unha convivencia baseada no respecto e na igualdade a área de igualdade do concello convocaba unha concentración ao mediodía.
No encontro, unha emocionada concelleira de Educación e Igualdade, Mayte Pérez Grao, desexaba que no futuro “non haxa que conmemorar ningún 25 de novembro, colocándonos todos e todas baixo o mesmo paraugas contra a violencia machista”. Dende o Concello amosábase así “o rexeitamento máis unánime contra a violencia contra as mulleres en calquera das súas manifestacións, non admitindo ningún tipo de xustificación”. Ademais, estacou o compromiso para seguir traballando “na erradicación de todas as formas de violencia machista e avogando por políticas activas para construír unha sociedade máis xusta e segura para todas as persoas, con independencia do seu xénero”.
Pérez Grao tamén pedía enerxicamente que “entre todos e todas fagamos unha Quiroga na que este tipo de conductas non teñan cabida”. A concentración remataba cun minuto de silencio polas 1.237 mulleres que foron asasinadas en España dende o ano 2003, 52 delas neste 2023, deixando a 49 nenos e nenas orfos.
Esta xuntanza formaba parte dos actos que dende o Goberno de Quiroga se organizaron con motivo da conmemoración do 25 de novembro, Día Internacional da eliminación da Violencia contra as Mulleres. Entre o programa organizado por esta causa tamén se atopaba un obradoiro O Consentimento, que se desenvolvía o venres pola mañá no CEIP de Quiroga e a charla informativa sobre as agresións sexuais e a violencia sexual que se desenvolverá o luns no IES de Quiroga.
