Lugo Monumental convoca un concurso de escaparatismo do Nadal no centro histórico entre os seus asociados coa finalidade de colaborar na decoración festiva do centro de Lugo.
Poderán participar os asociados que estean ao día das súas cotas e deberán enviar unha fotografía do escaparate ao correo asociacion@lugomonumental.es indicando o seu desexo de participar. Tomaranse en consideración os escaparates instalados entre o venres 15 de decembro e o venres 5 de xaneiro.
A asociación establece tres premios, todos eles consistentes en importes a gastar en establecementos asociados que serán de 300 euros o primeiro, 200 o segundo e 100 o terceiro.
O titular do establecemento gañador do concurso de escaparates do 2023 será invitado a formar parte do xurado da próxima edición.
