Renóvanse, en total 21 luminarias, cun aforro de 6269 kWh, mellorando a eficiencia e a uniformidade do alumeado, e eliminando elementos contaminantes utilizados nas antigas luminarias.
O tenente alcalde do Concello de Lugo, Rubén Arroxo, anunciou unha nova actuación dentro do plan de renovación de alumeado público da Tenencia de Alcaldía. “Seguimos a traballar na redución do gasto público en alumeado mentres melloramos a calidade e a eficiencia da rede, aumentando a iluminación en zonas escuras e retirando as luminarias con elementos contaminantes”, explicou Rubén Arroxo.
O Goberno de Lugo está a renovar as luminarias da rúa Quiroga Ballesteros, instalando novas luminarias e que pasarán a ser luminarias LED de baixo consumo e alta eficiencia. En total, substitúense 21 luminarias de entre 70 e 160 kWh por LED de entre 20 e 50W, cun investimento próximo aos 5.000€.
O consumo enerxético do alumeado desta zona reducirase en 6.269kWh, permitindo que Lugo avance na implantación dun alumeado eficiente en toda a cidade. Arroxo lembrou que a concellería de Infraestruturas realiza un gran investimento anual na renovación do alumeado público, “con actuacións que permiten aforrar cartos de todas e todos os lucenses na factura da luz que ten que asumir o Concello”, explicou.
