Por Chantada demanda responsabilidades políticas pola “crítica” situación do PAC de Chantada. Segundo expoñen, para agravar a situación, agora as persoas sanitarias fican sen servizo de taxi, como mínimo deica o luns. “Isto significa que deberán tirar de ambulancia para calquera saída desde o PAC tamén para as atencións domiciliarias que se fan os sábados á mañá e en caso de emerxencia atrasaríanse os tempos de resposta ao ocupar a ambulancia para saídas onde non sería necesaria. E o luns veremos que pasa para os servizos de anticoagulante”, denuncian.
Esta mostra “de incompetencia do Sergas vén dada pola negativa da xerencia a negociar cos taxistas”. Segundo eles, cada semana que pasa queda máis claro que “a folla de rota do PP procura á mantenta que a sanidade funcione mal porque senón é malo de entender semellante cúmulo de despropósitos”.
Neste censo tamén critican a actitude do alcalde. “Onte no pleno o alcalde aínda tivo valor a dicir que facía o que podía e que a cousa aínda vai ser peor por xubilacións e mesmo acusou de mentireiros as veciñas e veciños que lle lembraron na rúa que preferiu as siglas a mollarse e moverse por algo tan básico e esencial como unha atención sanitaria pública e digna para todas e todos. Nada novo como cando votaba en Lugo contra os cartos do canon para Chantada”.
IGV entende que desde a Xunta e o PP deben asumir responsabilidades e cesar as persoas que son incapaces de xestionar algo tan importante e básico como a sanidade pública. “Arestora nas comarcas rurais temos de facto suspendido o dereito constitucional á sanidade”, conclúen.
