O presidente do Tribunal Superior de Xustiza de Galicia (TSXG), José María Gómez y Díaz-Castroverde, desprazouse hoxe a Lugo para coñecer as demandas dos xuíces e xuízas da Audiencia Provincial e dos órganos unipersoais da localidade. Estes últimos debateron durante a reunión sobre a redución dos tempos de espera de informes do Imelga, especialmente os psicosociais, e sobre como paliar a entrada de asuntos nalgunhas xurisdicións.
Pola súa banda, os maxistrados/as da Audiencia Provincial solicitaron reforzos para a sección civil, co obxectivo de rebaixar a bolsa de causas pendentes. Nestes momentos, a sección xa está reforzada cunha xuíza de adscrición territorial, destinada ao órgano polo presidente do TSXG.
Os órganos xudiciais de Lugo, segundo os últimos datos dispoñibles, ingresaron entre xaneiro e setembro do ano pasado 19.707 procedementos, un 7,4 % máis que nas mesmas datas de 2022, e resolveron 18.549, un 1,9 % máis. Os casos en trámite -14.004- aumentaron un 10,7 %.
