A subdelegada do Goberno en Lugo, Isabel Rodríguez, recibiu esta mañá ao novo xefe provincial de tráfico, Alberto Rodríguez Fernández, que asume a xefatura da Dirección Xeral de Tráfico (DXT) na provincia de Lugo. A subdelegada deu a benvida ao novo cargo nun primeiro encontro no que estableceron as prioridades para os próximos meses coa vista posta na progresiva redución da sinistralidade viaria.
Alberto Rodríguez, funcionario de carreira da Escala Superior de Técnicos de Tráfico e licenciado en Psicoloxía, colle o relevo da Xefatura Provincial en Lugo despois de desempeñar nos últimos anos o mesmo posto na provincia catalá de Girona.
Isabel Rodríguez aproveitou para agradecer o labor do seu antecesor, Ángel Álvarez, e comezou a trazar as liñas de traballo con Rodríguez Fernández incidindo nas campañas de sensibilización e educación viaria, cuestións nas que o novo xefe provincial ten unha formación especializada. “Estou convencida de que porá á disposición dos lucenses toda a súa traxectoria, e que xuntos traballaremos intensamente coa vista posta no aumento da seguridade nas estradas e a redución dos accidentes de tráfico”.
Traxectoria
Alberto Rodríguez Fernández, funcionario de carreira da Escala Superior de Técnicos de Tráfico, é licenciado en Psicoloxía pola especialidade de psicoloxía social e do traballo. Ten formación en coaching executivo e de equipos, docencia da formación profesional para o emprego e cursou o máster de Dirección de Recursos Humanos, así como a titulación de psicólogo-formador para cursos de sensibilización e reeducación viaria.
Desde novembro de 2022 ostentou o cargo de Xefe provincial accidental de Tráfico na provincia de Girona, onde tamén desempeñou previamente os postos de Subxefe provincial e Xefe de sección de Seguridade Vial. Na súa faceta docente, impartiu módulos de accións formativas dirixidas a persoas desempregadas e tamén para fundacións sociais, sendo responsable así mesmo noutros proxectos de xestión do talento, desenvolvemento persoal e RRHH en distintas empresas.
