A CIG Saúde A Mariña denuncia que o Hospital da Mariña queda sen especialistas en Uroloxía e Dixestivo e esixen á directora do distrito sanitario que dea unha solución ou dimita.
Concretamente, o hospital queda sen especialistas en Uroloxía desde este sábado e ata o luns, 12 de febreiro, e será o HULA e a través dun teléfono quen atenda e decida si estes pacientes requiren de ingreso. De ser así, o paciente será trasladado para ingresar no HULA.
Do mesmo xeito “desde este sábado e ata o mércores non haberá endoscopista no Hospital da Mariña e os pacientes serán derivados tamén ao HULA”, confirman dende a central sindical.
Dende CIG Saúde A Mariña, esixen por isto á directora do Distrito Sanitario da Mariña, María José Cortés Canay, que exerza as súas competencias e que empregue os recursos necesarios para garantir unha atención de proximidade, e de non ser capaz de defender a atención sanitaria da veciñanza da Mariña, “que presente a súa dimisión”, sosteñen.
A situación da sanidade pública na Mariña
Diante disto, pregúntanse se “é este un exemplo do futuro da sanidade pública da Mariña anunciado por Rueda”, ao que solicitan que indique “como se atende unha urxencia urolóxica vía telefónica e a máis de 100 quilómetros de distancia. Que foi da promesa de que ían vir os médicos de Lugo a reforzar o hospital cando a realidade é o continuo traslado de pacientes ao HULA?
Por iso, demandan saber “onde anda agochado nestes momentos Rueda para que nos relate cales son os máis e mellores servizos que ían implantar, onde está a blindaxe do hospital ou cales son os numerosos profesionais que ían vir para Burela”.
Diante desta situación, animan a todos os usuarios e usuarias e presentar reclamacións oficiais a través do servizo de Atención ao Paciente.
“Debe primarse o dereito da cidadanía a recibir unha atención sanitaria de calidade pública”, sosteñen. Con este obxectivo subliña que “a CIG Saúde da Mariña estivo, está e estará na defensa da sanidade pública, dos dereitos das traballadoras e traballadores, do dereito dos veciños e veciñas da Mariña a contar con servizos médicos de calidade tanto no hospital como nos centros de saúde da comarca”.
