Katy Varela pregunta ao alcalde “de que nos serve que anuncie un investimento millonario para suprimir os pasos a nivel se nas parroquias non hai auga e na cidade non hai presión suficiente para que chegue a auga ás vivendas?”.
O PP de Monforte esixe a Tomé unha solución aos problemas co abastecemento da auga en lugar de bombas de fume cos pasos a nivel porque “de que nos serve se non temos auga nas casas?”.
Así de contundente se amosou a voceira do PP de Monforte, Katy Varela, tras ver como hai tres días que as parroquias do municipio están sen auga e hai problemas coa presión na cidade e José Tomé anuncia que vai a suprimir os pasos a nivel no municipio.
Recordan dende o PP de Monforte que na madrugada do luns, toda a cidade quedou sen auga e que dende o propio Concello “se limitaron a comunicar que se debe a unha avaría na potabilizadora e restrinxen a auga ás parroquias, pero “onte seguiamos no mesmo punto, coas parroquias sen auga e con moitos barrios da cidade sen presión de auga”.
Así, engade que “a única saída que atopan no goberno local é dicir que para arranxar a avaría eléctrica están a falar coa empresa subministradora da enerxía. No tempo no que vivimos non se pode ter a un municipio como Monforte con pouca presión ou directamente sen auga. José Tomé ten que asumir as súas responsabilidades”, sentenciou.
