O Partido Popular, en defensa dos traballadores de Alcoa, eleva ao pleno do Congreso a petición de que o Goberno habilite unha partida extraordinaria cos 896 millóns de euros que permite a Unión Europea para as empresas electrointensivas, e así garantir de xeito directo a viabilidade da factoría de San Cibrao e, en consecuencia, a produción e o mantemento dos empregos directos e indirectos que xera. A este respecto e, en paralelo, adiantaron que, na primeira lei económica que tramite o Goberno, presentarán unha emenda no mesmo sentido.
Os populares, segundo explicaron este venres os deputados na Cámara Baixa -Francisco Conde e Jaime de Olano- aos alcaldes e voceiros de A Mariña, adoptaron esta decisión porque, en primeiro lugar, este martes o seu Grupo Parlamentario sacou adiante, na Comisión de Industria e Turismo e cuxo voceiro é o deputado Francisco Conde, a Proposición Non de Lei na que se pedía ao Executivo dedicar o 25% dos ingresos de CO2 a estas empresas e, contribuír con elo, a que dispoñan dun prezo estable e competitivo; e, segundo, logo de que Pedro Sánchez anunciase que o Goberno non terá Orzamentos ata 2025 como consecuencia da convocatoria electoral de Cataluña.
“Xa sabemos que non imos ter Orzamentos en 2024, pero iso non implica de que existan fórmulas legais e políticas para que o Goberno cumpra o acordo que conseguimos esta mesma semana. Agora elevarémolo ao pleno do Congreso, esperando que o Executivo concrete o mecanismo para facelo. Non sería xustificable, remarca Conde, que, a situación política xerada e que coñecemos hai unhas horas, bloquease un acordo tan importante para esta comarca e para os traballadores da factoría que está ás nosas costas”, defendeu.
APOIO Á POSTURA DA XUNTA
A este respecto, os deputados comparten a postura da Xunta de Galicia, que a través da conselleira de Economía, Industria e Innovación en funcións, pediu no día de onte que non se dilate, como así se fixo público, a reunión da mesa de seguimento prevista para o día 21 deste mes, pois, segundo destacou o voceiro de Industria no Congreso, “os traballadores necesitas certezas”.
“Aprazar esta xuntanza tan só serve para aumentar a súa inestabilidade. Secundamos, por tanto, unha por unha as palabras emitidas intelixentemente pola conselleira unha vez coñecida a decisión de aprazamento de Alcoa”, remarcou Conde.
“ESTAMOS NA SOLUCIÓN”
A proposta do Grupo do PP ten como obxectivo evitar a discriminación que sofren as electrointensivas españolas “por una decisión política” do Goberno Central. As empresas de Alemaña ou Francia non só soportan un prezo notablemente inferior ao que existe en España, senón que o importe das axudas concedidas polos seus gobernos para compensar os custos do gas e da electricidade é moi superior. A modo de exemplo, os populares destacaron o caso concreto do país alemán que, dentro do Marco Temporal de Crise e Transición da CE, aprobou 49.000 millóns de euros, cun máximo de 150 millóns de euros por empresa; é dicir, 100 veces máis en axudas que as que destina o Executivo español.
Dende o Partido Popular pedirán tamén a aprobación da modificación do Estatuto dos consumidores para que as empresas nacionais compitan en igualdade de condicións coas do resto de Europa. Neste senso, plantexan a bonificación de peaxes do 80% e activar as subastas de enerxía de fontes renovables específicas.
“No Partido Popular estamos na solución. O Goberno debe corrixir a súa política enerxética porque, ata o momento, o único que conseguiu é que as empresas vexan mermada a súa competitividade e a súa capacidade de investimento”, destacaron Conde e Olano. Precisamente, este último engadiu: “isto é a consecuencia de que tamén recorten a súa produción ou se vaian a outros países”.
O PECHE DE ALCOA, EN CLAVE LOCAL
Pola súa banda, os alcaldes e voceiros valoraron positivamente a decisión do Grupo Parlamentario Popular nas Cortes, xa que, de materializarse a ameaza de peche que pesa sobre a planta da Mariña e que cada vez cobra más forza, “sería algo demoledor para a economía e para o futuro desta comarca”. Con esta contundencia, e en nome de todo o PP desta zona da provincia, se pronunciaron os representantes de Xove e de Cervo.
