Coa lectura ás 12 da mañá na Praza de España do Saúda por parte do alcalde de Monforte, José Tomé Roca, deu comezo oficialmente a XX Feira Medieval de Monforte, que se desenvolve este sábado día 30 e mañá domingo 31 de marzo na cidade do Cabe.
O rexedor estivo acompañado no acto inaugural pola 1ª tenente de Alcalde, Gloria Prada, e os concelleiros de Cultura, Marina Doutón, Servizos, José Luis Losada, de Deportes, José Manuel Mougán, de Consumo, Regina López, e de Muller e Igualdade, Margarita López, así como diversos membros da Corporación municipal, o inspector xefe da Policía Local de Monforte, Miguel Martínez, e o oficial Néstor Álvarez e o inspector xefe do corpo de Policía de Monforte, Pablo Fernández.
Tamén asistiron diversas autoridades do eido provincial como a deputada da Área de Réxime Interior Promoción e Turismo, Pilar García Porto, o deputado de Participación Cidadá, Iván Castro, o deputado de Recursos Sostibles, Francisco Cajoto, a deputada de Muller e Igualdade, Marisol Morandeira, o xefe territorial de Presidencia, Xustiza e Deportes, Gerardo Criado, o presidente da Confederación Hidrográfica Miño-Sil, José Antonio Quiroga, a deputada no Congreso, Patricia Otero, ou o senador César Mogo, entre outras autoridades.
Tras o saúdo oficial do alcalde, tivo lugar a salva de artillería, cunha réplica dunha bombarda do século XIV, que deu inicio oficial á Feira. A continuación, Tomé acompañado polo equipo de Goberno e o resto de invitados, visitaron a Feira Medieval percorrendo as rúas que, a pesares das inclemencias do tempo, estaban ateigadas de público, desfrutando das distintas actividades da Feira.
