O colectivo A Xanela das Pontes comezou xa a preparar a segunda edición da Carreira Andaina Solidaria As Pontes Contigo e para iso convocou un concurso para escoller o cartel anunciador.
Os carteis participantes deberán reflectir o espírito solidario e a inclusión de persoas con diversidade funcional e maiores na carreira, promovendo os valores da solidariedade, a igualdade e o deporte inclusivo.
A proposta gañadora será utilizada como imaxe oficial da segunda edición da carreira As Pontes Contigo, que terá lugar o 20 de setembro, aparecendo en todos os materiais promocionais do evento.
Poderán participar no concurso todas as persoas que o desexen, de maneira individual ou en grupo, sen límite de idade, quedando excluídas aquelas persoas que teñan relación profesional ou ben formen parte da directiva da Asociación A Xanela.
As persoas participantes deberán enviar as súas propostas de cartel ao correo electrónico aspontescontigocarreira@gmail.com, indicando no asunto Concurso de Carteis As Pontes Contigo. No corpo do correo deberán incluír os seus datos persoais (nome, apelidos, dirección e teléfono de contacto).
O prazo de presentación de propostas comezará o día da publicación destas bases e rematará o día 30 de abril ás 23:59 horas. O xurado escollerá o cartel o día 3 de maio e será comunicado o día 6. Outorgarase un único premio en metálico ao cartel gañador, consistente en 50 euros.
