A AESIA organiza en Lugo un encontro aberto á cidadanía para debater sobre a intelixencia artificial
A Axencia Española de Supervisión de Intelixencia Artificial (AESIA) celebrará este venres 6 de novembro en Lugo un Encontro coa Cidadanía para achegar a intelixencia artificial ao público xeral e recoller opinións, dúbidas e preocupacións sobre o impacto desta tecnoloxía. A cita terá lugar ás 12:45 horas no salón de actos da Deputación Provincial.
A actividade forma parte do Laboratorio de Ideas en Intelixencia Artificial, un espazo de análise e debate impulsado pola AESIA, organismo público adscrito ao Ministerio para a Transformación Dixital. Durante o encontro explicaranse conceptos básicos sobre a IA, ofreceranse consellos para utilizala de maneira responsable e abordaranse ferramentas para identificar contidos falsos.
A convocatoria está dirixida a todos os públicos e non require coñecementos previos sobre esta tecnoloxía. Ademais de divulgar información, pretende abrir un espazo de participación no que as persoas asistentes poidan expresar as súas inquedanzas e opinións. As achegas recollidas incorporaranse aos informes e documentos de análise do Laboratorio, que servirán de base para elaborar propostas de políticas públicas e melloras lexislativas e sociais que garantan que a IA estea ao servizo das persoas.
O Laboratorio de Ideas está integrado por unha vintena de expertos de diferentes ámbitos, como a tecnoloxía, o dereito, a educación, a filosofía, a igualdade, as relacións laborais e os dereitos humanos. O seu traballo céntrase en anticipar e avaliar os efectos da intelixencia artificial na sociedade e promover un desenvolvemento ético e confiable.
A iniciativa conta con catro áreas de investigación específicas: mulleres e IA, desinformación e IA, menores e IA, e mercado laboral e IA.