Educación

En Secundaria a comparativa das adxudicacións definitivas de destinos provisionais deste curso fronte ao anterior deixa só 535 vacantes máis, ao pasar de 4.310 a 4.845

A organización sindical esixe ao conselleiro de Educación que detalle en que centros están as 956 prazas docentes máis anunciadas para Secundaria e as 1.600 acumuladas desde 2023, e contrástaas coas 591 adxudicacións provisionais máis respecto ao curso pasado.

A CIG-Ensino denuncia que o curso 2026/2027 comezou con cifras de profesorado que considera falsas e con múltiples incidencias nos centros educativos galegos, derivadas principalmente da falta de persoal para atender a diversidade e desdobrar aulas, de obras inacabadas ou deficiencias estruturais e da redución da oferta formativa. Así o explicou a secretaria nacional da CIG-Ensino, Laura Arroxo, quen acusou o conselleiro de Educación, Román Rodríguez, de empregar cifras que non se corresponden coa realidade dos centros.

Segundo a central sindical, en Secundaria a comparativa das adxudicacións definitivas de destinos provisionais deste curso fronte ao anterior deixa só 535 vacantes máis, ao pasar de 4.310 a 4.845. A CIG-Ensino advirte de que estes datos non implican que exista realmente ese incremento de profesorado, xa que 479 das vacantes corresponden a profesorado definitivo con comisión de servizos, polo que reclama ao conselleiro que detalle onde foron asignados os supostos 956 docentes máis.

Arroxo tamén alertou da diminución do funcionariado en prácticas das especialidades de Secundaria e FP, que este curso é un 18% inferior ao do ano pasado, con 610 fronte a 752, e un 46% menor que en 2021, cando se alcanzaran os 1.317.

A CIG-Ensino sinala ademais un incremento das vacantes adxudicadas con afíns e ámbitos da FP básica. En concreto, contabiliza 96 máis con afíns e 92 máis con ámbitos da FP básica. Segundo explica a organización, isto implica que profesorado dunha especialidade debe impartir materias doutras, como o caso dun docente de Matemáticas que imparta Inglés. O sindicato considera que case unha terceira parte das prazas provisionais non son "limpas", o que supón unha maior esixencia na preparación das clases e un empeoramento das condicións laborais.

En Infantil e Primaria, a comparativa das vacantes provisionais adxudicadas deixa 56 máis que o curso pasado, cun incremento do 31,5% das prazas bilingües. A organización cifra en 448 as vacantes con afíns e en 290 as itinerancias, polo que un 11% dos mestres e mestras adxudicados imparten outra especialidade dentro do seu horario e un 17% teñen que itinerar entre varios centros. A CIG-Ensino destaca especialmente que o 61% das prazas de Orientación son itinerantes.

Dentro das especialidades do corpo de mestres, a organización sinala un incremento das prazas de Pedagoxía Terapéutica e Audición e Linguaxe, relacionado co Plan Mega, pero denuncia que as vacantes adxudicadas na especialidade de Primaria baixaron en 114 e as de Música en 11.

No relativo á atención á diversidade, a CIG-Ensino considera incumprido o anuncio da Xunta sobre a incorporación de 100 especialistas de Pedagoxía Terapéutica e Audición e Linguaxe en Secundaria. Segundo a central sindical, a diferenza respecto ao curso pasado é de só cinco prazas. Por este motivo, Laura Arroxo esixiu a Román Rodríguez "poñer luz sobre a propaganda e revelar unha por unha en que centros están estes especialistas pantasma".

A organización tamén cuestiona as 50 novas prazas de Orientación anunciadas para Secundaria, xa que no Concurso de Adxudicación de Destinos Provisionais só se produciron 45 adxudicacións máis que o ano anterior. Para a CIG-Ensino, son insuficientes para os 311 centros que imparten estas ensinanzas e denuncia ademais que practicamente ningunha destas prazas se adxudicou en Lugo e Ourense, segundo os datos dos que dispón.

334 vacantes aínda sen cubrir

A menos de 24 horas do inicio do curso, a CIG-Ensino denunciara que quedaban 1.150 vacantes sen cubrir. Tres días lectivos despois, a organización asegura que había ensinanzas nas que apenas comezaran os chamamentos, como a FP e as ensinanzas de réxime especial. Arroxo criticou que a Consellaría non aceptase un comezo escalonado do curso e advertiu de que hai alumnado que permanece ata dúas semanas ou mesmo un mes sen profesorado.

Na primeira hora da mañá, a organización contabilizaba 334 vacantes sen cubrir: catro do corpo de mestres, 250 do profesorado de ensino secundario, seis do profesorado especialista de sectores singulares da FP, 31 en Conservatorios, sete en escolas de artes e 36 en Escolas Oficiais de Idiomas.

A CIG-Ensino asegura que segue sen ter unha radiografía completa da situación dos centros, xa que as incidencias se producen diariamente. Entre os casos sinalados atópanse Melide, onde as familias decidiron non enviar o alumnado a clase pola falta de persoal, e Begonte, pola non autorización de desdobres. A organización tamén denuncia problemas relacionados con obras inacabadas e infraestruturas deficientes en distintos puntos de Galicia.

Na provincia de Lugo, a CIG-Ensino ten constancia de falta de persoal no CEIP de Guntín, ademais de Begonte, así como dunha redución da oferta formativa de FP no IES Lois Peña Novo de Vilalba e no IES Sanxillao de Lugo. Tamén denuncia a posta en marcha de programas formativos sen materiais nin recursos no CEE Santa María.

En Ourense, a organización denuncia a caída dun falso teito nunha aula nova de Infantil do CEIP Ben-Cho-Shey do Pereiro, sen danos persoais. Tamén alerta da perda dunha decena de mestras na adxudicación deste curso e da falta de especialistas para atender a diversidade, como no CEIP Mariñamansa, así como da ausencia de desdobres necesarios no CEIP de Seixalbo.

Na comarca da Coruña, a CIG-Ensino sinala protestas pola retirada dun tellado con amianto durante o curso e problemas con obras en distintos centros. Na comarca de Compostela, denuncia a falta de persoal de Orientación a tempo completo no CPI Os Dices de Rois e reducións da oferta de FP en varios centros.

En Pontevedra, a organización sitúa como caso especialmente grave o do IES Pedro Floriani de Redondela, que iniciou un novo ciclo de FP básica sen máis profesorado e sen o especialista de Pedagoxía Terapéutica solicitado. Tamén reclama actuacións no IES Frei Martín Sarmiento e denuncia a supresión de ciclos no IES Armando Cotarelo Valledor e en Valga. Na área de Vigo, sinala falta de persoal e obras que non remataron a tempo no CEIP Carballal-Cabral e no IES República Oriental do Uruguai.

Por último, a CIG-Ensino denuncia irregularidades nas adxudicacións do corpo de mestres, con profesorado ao que se asignaron horarios de especialidades afíns en lugar da súa propia e funcionariado en prácticas ao que se lle asignou de oficio Inglés, algo que, segundo a organización, non permite a normativa. Tamén alerta de centros nos que se supera a ratio de Bacharelato ou ESO e de problemas relacionados coa falta de prazas nos comedores escolares e co transporte, que ao seu xuízo dificultan o correcto funcionamento dos centros e non garanten unha atención en igualdade para todo o alumnado.