Educación

O Ministerio prevé aprobar por real decreto que o alumnado con necesidades educativas especiais compute como dobre en todas as etapas a partir do curso 2027/2028

A CIG-Ensino fixo unha valoración crítica da última Mesa Sectorial Docente do Estado desta lexislatura, ao considerar que a promesa de que esta sería a «lexislatura do profesorado» queda sen cumprir. O sindicato lamenta que non se vaian aprobar medidas como a redución das ratios en Primaria e Secundaria e a baixada do horario lectivo do profesorado, ao decaer o proxecto de lei que as contemplaba tras a disolución das Cortes Xerais.

Na reunión, celebrada este mércores, o Ministerio de Educación abordou tres proxectos de real decreto que o Goberno pretende aprobar antes das eleccións do 29 de novembro, xa que despois non podería facelo en funcións. Entre eles destaca a modificación dos requisitos mínimos dos centros educativos e da ordenación da Formación Profesional, que permitirá introducir cambios nas ratios dalgunhas ensinanzas non obrigatorias.

Os responsables ministeriais explicaron que non é posible modificar por esta vía as ratios de Primaria e Secundaria, xa que precisan dunha norma con rango de lei. A disolución das Cortes provocou que decaese o proxecto lexislativo que pretendía reducir o número máximo de alumnos por aula nestas etapas e tamén o horario lectivo dos corpos docentes de Mestres, Secundaria, FP e ensinanzas de réxime especial.

A proposta que o Ministerio prevé aprobar por vía de urxencia inclúe novas ratios para o primeiro ciclo de Educación Infantil, con máximos de catro alumnos por docente de cero a un ano, seis de un a dous anos e oito de dous a tres anos. A aplicación comezaría no curso 2027/2028 e desenvolveríase progresivamente ata completarse ao inicio do curso 2029/2030.

No segundo ciclo de Infantil, a ratio máxima quedaría fixada en 20 estudantes por unidade escolar, tamén cunha implantación progresiva desde o curso 2027/2028 ata o inicio de 2029/2030. No Bacharelato, o máximo sería de 30 estudantes por unidade, mentres que nos ciclos de FP básica se establecería unha ratio de 15 estudantes por docente. Nestes dous últimos casos, a aplicación comezaría no curso 2029/2030 e completaríase ao inicio de 2030/2031.

Outra das medidas previstas é que o alumnado con necesidades educativas especiais (NEE) compute como dobre para determinar a ratio máxima nas aulas ordinarias de todas as etapas educativas a partir do curso 2027/2028.

A CIG-Ensino reclama máis ambición e rapidez

A secretaria nacional da CIG-Ensino, Laura Arroxo, cuestionou que a denominada «lexislatura do profesorado» remate sen melloras reais nas condicións laborais do colectivo. Ademais de lamentar que non se poida aprobar a redución do horario lectivo e das ratios en Primaria e Secundaria, criticou que nin sequera se iniciase a reforma do acceso á función pública docente, que seguirá rexéndose por un decreto de hai vinte anos e por temarios de máis de tres décadas. Tamén lamentou que non se abordasen cuestións como a creación dun único corpo docente encadrado no grupo A1.

Con todo, o sindicato valorou positivamente algunhas das medidas incluídas no proxecto de real decreto, especialmente as novas ratios do primeiro ciclo de Infantil e da FP básica, así como o cómputo dobre do alumnado con NEE en todas as etapas, sen necesidade de que teña recoñecido un grao de discapacidade ou dependencia.

A CIG-Ensino pediu ao Ministerio que sexa «máis ambicioso» tanto nas ratios do segundo ciclo de Infantil, para o que propón un máximo de 15 alumnos por aula, como no Bacharelato, onde defende un límite de 25. Tamén reclamou que as medidas comecen a aplicarse o vindeiro curso en todas as etapas, en lugar de atrasar a súa implantación ata 2029.

Arroxo rexeitou, ademais, que se introduza unha disposición adicional que permita establecer excepcións ás ratios máximas, ao considerar que podería facilitar o seu incumprimento. A responsable sindical insistiu na necesidade de limitar a 20 o número de estudantes por aula en Primaria e a 25 en Secundaria, aínda que recoñeceu as limitacións normativas para aprobar estas medidas.

A central tamén reclamou que o alumnado con necesidades específicas de apoio educativo (NEAE) compute como dobre en todas as etapas desde o próximo curso. Así mesmo, propuxo incorporar ratios específicas para o persoal de orientación e para os especialistas en Pedagoxía Terapéutica (PT) e Audición e Linguaxe (AL).

Reivindicacións para a escola rural e os centros educativos

No relativo á escola rural, a CIG-Ensino valorou positivamente a incorporación de criterios cualitativos para decidir a continuidade dos centros, a posibilidade de adaptar as ratios ás características de cada zona e a garantía de recursos humanos suficientes, conectividade e medios dixitais para favorecer a igualdade de oportunidades.

Porén, o sindicato reclamou que se establezan ratios máximas para as aulas mixtas e que as adaptacións previstas no real decreto sirvan sempre para reducir o número de alumnos, nunca para aumentalo.

En canto aos requisitos mínimos dos centros educativos, a organización valorou a inclusión da climatización e dos protocolos fronte ás temperaturas extremas, pero considerou insuficientes outras medidas. Así, pediu que se incorporen espazos exteriores naturais de dimensións suficientes e acondicionados para o seu uso durante todo o curso escolar.

Tamén cuestionou que a aplicación dos protocolos climáticos quede en mans dos centros no marco da súa autonomía, cun simple asesoramento, e defendeu que esta responsabilidade debe corresponder á Administración, acompañada dos investimentos e recursos necesarios.

Outro dos proxectos de real decreto que o Goberno pretende aprobar antes das eleccións busca modificar as especialidades dos corpos docentes en relación coas linguas non oficiais que conten con protección legal nas comunidades autónomas.

A CIG-Ensino valorou positivamente esta norma e lembrou que o galego tamén se fala en territorios onde non é oficial, como a franxa occidental de Asturias, O Bierzo e Sanabria, e o Val de Xálima, en Estremadura. Por iso, considera que a normativa debe servir para que esas comunidades creen especialidades docentes que garantan o ensino do galego con profesorado especializado.

O sindicato insistiu, finalmente, na necesidade de garantir os dereitos das linguas propias oficiais de cada territorio no sistema educativo, cunha referencia expresa ás políticas da Xunta, ás que acusa de reducir a presenza do galego nas aulas.