A CIG-Industria convoca mobilizacións no metal de Pontevedra ante o bloqueo das negociacións
A CIG-Industria aposta polo conflito no sector do metal da provincia de Pontevedra ante o bloqueo das negociacións do convenio colectivo, tras a novena xuntanza da mesa celebrada este mércores 15 de abril.
Segundo denuncia a central sindical, a patronal mantén un posicionamento que fai “imposíbel o acordo”, ao presentar propostas que consideran insuficientes e que non permiten mellorar nin dignificar as condicións laborais do sector.
Diante desta situación, a CIG-Industria convoca unha primeira mobilización: unha concentración de delegadas e delegados o vindeiro martes 21 de abril, ás 11:00 horas, diante da sede da organización empresarial ATRA en Vigo.
Entre as propostas da patronal figura un convenio de catro anos cun incremento salarial total do 13% e unha revisión vinculada ao IPC cun tope máximo do 2%. Tamén inclúe unha redución de xornada de oito horas para 2028, o aumento das vacacións ata os 24 días —aínda que este día adicional non suporía unha redución real da xornada— e diferenzas salariais entre categorías profesionais.
Desde a CIG-Industria consideran inaceptábel limitar a revisión ao IPC, advertindo de que “se correría o risco de non garantir nin sequera o poder adquisitivo” nun contexto económico marcado pola inflación.
O sindicato critica tamén outras propostas como a limitación do plus de tóxicos a determinados ámbitos, a falta de medidas concretas fronte ao estrés térmico, a negativa a garantir xubilacións parciais ou a ausencia de avances en cuestións como a subrogación, a xornada continua no verán ou a regulación da subcontratación.
Ante este escenario, a central sindical advirte de que podería endurecer as mobilizacións e mesmo convocar folga se a patronal non modifica a súa postura e acepta algunhas das principais reivindicacións da parte social.