A CIG inicia unha campaña en toda Galicia para reclamar melloras laborais na hostalaría
A CIG-Servizos anunciou o inicio dunha campaña de mobilizacións en toda Galicia para denunciar a precariedade laboral que, ao seu xuízo, continúa afectando ao sector da hostalaría. A iniciativa desenvolverase baixo o lema “Por unhas condicións dignas na hostalaría! Convenio galego xa!” e arrincará este venres 3 de xullo cunha concentración na praza de Galiza de Santiago de Compostela ás 11.30 horas.
O secretario nacional da CIG-Servizos, Carlos Alján, asegurou que a situación laboral das persoas traballadoras da hostalaría continúa marcada por unhas condicións cada vez máis precarias, tanto en grandes cadeas hoteleiras como en pequenas e medianas empresas. Segundo explicou, existen “cargas de traballo excesivas, reducidos cadros de persoal e a falta total de cobertura das ausencias”, circunstancias que derivan nun aumento da presión laboral e nunha intensificación dos ritmos de traballo.
Desde o sindicato advirten de que esta situación ten consecuencias directas sobre a saúde do persoal, provocando un incremento das baixas por enfermidades músculo-esqueléticas, estrés e ansiedade. Alján sinalou que, mentres os indicadores turísticos continúan medrando e os medios de comunicación destacan os bos resultados do sector en ámbitos como o turismo de costa, rural, cultural ou vinculado ao Camiño de Santiago, as condicións laborais non experimentan unha mellora equivalente.
A CIG considera que unha das causas polas que as empresas teñen dificultades para atopar persoal cualificado reside precisamente nas condicións de traballo existentes. O sindicato lembra que a hostalaría presenta unha elevada porcentaxe de contratos a tempo parcial, moitos deles baixo a fórmula de fixo descontinuo, e denuncia tamén os problemas de conciliación derivados das quendas partidas e do traballo habitual en domingos e festivos.
Outro dos aspectos que critica a central sindical é a contratación de persoal en categorías inferiores ás funcións que realmente desempeña. Segundo Alján, moitas persoas son contratadas como axudantes pero realizan desde o primeiro día tarefas propias de camareiros, cociñeiros ou recepcionistas, percibindo salarios que cualificou de insuficientes e que apenas superan o Salario Mínimo Interprofesional.
A campaña chega nun momento no que están abertas as negociacións dos convenios provinciais da Coruña, Pontevedra e Lugo. A CIG asegura que as conversas avanzan con dificultade e acusa á patronal de pretender recortar dereitos e ofrecer incrementos salariais insuficientes para compensar a perda de poder adquisitivo acumulada nos últimos anos.
Entre as principais reivindicacións da organización sindical figura o incremento dos cadros de persoal, a transformación das xornadas parciais en completas cando sexa posible, a implantación de horarios máis estables e continuados que faciliten a conciliación, a contratación conforme ás categorías profesionais reais e a creación de complementos salariais que recoñezan aspectos como a responsabilidade, a polivalencia, a dispoñibilidade ou o traballo en domingos e festivos.
A CIG reclama tamén a creación dunha mesa de negociación autonómica que permita avanzar cara a un convenio galego de hostalaría. O sindicato considera que un marco laboral propio facilitaría a adaptación das condicións de traballo ás necesidades específicas do sector en Galicia.
Carlos Alján concluíu asegurando que “este sector non pode manterse instalado na constante precariedade” e avanzou que a organización continuará impulsando mobilizacións e accións reivindicativas para defender os dereitos das persoas traballadoras. “Porque sen persoal non hai hostalaría, e sen condicións dignas non hai futuro”, afirmou.