A Coruña converterá o porto nun gran escenario cultural co ciclo Son & Mar, que reunirá doce eventos entre setembro e outubro
O Concello da Coruña, a través do Consorcio de Turismo, organizará este outono unha nova edición de Son & Mar A Coruña, un ciclo cultural e musical que levará ao porto da cidade unha programación formada por doce eventos entre os meses de setembro e outubro.
A iniciativa combinará concertos, festivais temáticos, actividades familiares e propostas de acceso gratuíto, co obxectivo de consolidar A Coruña como un destino de referencia para o turismo cultural e de eventos tamén fóra da tempada estival.
O concelleiro de Cultura e Turismo, Gonzalo Castro, presentou este martes a programación e destacou que “grazas ao impulso dado polo Goberno de Inés Rey, continuamos a reforzar o posicionamento da Coruña como unha cidade capaz de atraer grandes eventos ao longo de todo o ano, ampliando a oferta cultural máis aló da tempada estival e xerando novas oportunidades para o sector turístico e hostaleiro”.
Castro tamén puxo en valor a colaboración entre o Concello, a Autoridade Portuaria e a Xunta de Galicia para facer posible este ciclo e sinalou que “este ciclo encaixa perfectamente na estratexia municipal de apostar por unha programación diversa, aberta a todos os públicos e capaz de combinar grandes nomes internacionais co talento galego, levando ademais a actividade cultural a un espazo tan singular como o porto da Coruña”.
Durante case un mes de actividade, máis de trinta artistas locais, nacionais e internacionais pasarán polos escenarios de Son & Mar. A programación incluirá estilos tan diversos como o pop, o indie, a música urbana, o reggaetón, a electrónica ou a música tradicional galega, apostando por unha oferta dirixida a públicos de todas as idades.
O ciclo abrirase o 18 de setembro coa actuación do DJ e produtor italiano Gabry Ponte. Nos días seguintes sucederanse propostas como o Picapop Tardeo, as actividades familiares de Mundo Juego, o espectáculo Sacro Mestiza, que fusiona música electrónica e flamenco, a cita urbana Dale Flow ou a festa internacional Bresh XXL.
A programación tamén reservará espazo para a música e a cultura galega con iniciativas como Orballo Cultural e Treboa Sonora, ademais de incluír varios eventos gratuítos pensados para fomentar a participación da cidadanía.
Segundo Gonzalo Castro, “o noso obxectivo é que a Coruña siga sendo un referente cultural no noroeste peninsular e que eventos como Son & Mar sirvan para atraer visitantes, dinamizar a economía local e ofrecer á cidadanía unha programación atractiva e de calidade”.
O peche desta edición terá lugar o 11 de outubro coa celebración do Wake Up! Festival, unha cita dedicada á música electrónica que porá o broche final ao ciclo.
A programación completa de Son & Mar A Coruña 2026 é a seguinte:
- 18 de setembro: Gabry Ponte.19 de setembro: Picapop Tardeo.
- 20 de setembro: Mundo Juego (gratuito).
- 25 de setembro: Sacro Mestiza.
- 26 de setembro: Dale Flow.
- 27 de setembro: Orballo Cultural (gratuito).
- 2 de outubro: Equis.
- 3 de outubro: Treboa Sonora.
- 4 de outubro: Mestizo Runner (gratuito).
- 9 de outubro: Bresh XXL.
- 10 de outubro: One Dance. Edición Tardeo.
- 11 de outubro: Wake Up! Festival.