A Deputación de Pontevedra lidera un proxecto europeo de 2,5 millóns para mellorar a eficiencia enerxética en edificios públicos
A Deputación de Pontevedra acolleu a reunión de lanzamento do proxecto europeo Smart Building-COOP, unha iniciativa dotada con máis de 2,5 millóns de euros destinada a impulsar a eficiencia enerxética e a sustentabilidade dos edificios públicos na eurorrexión Galicia–Norte de Portugal.
O encontro, celebrado no Edificio Administrativo provincial, reuniu a persoal técnico e representantes institucionais das entidades socias. Foi inaugurado polo deputado provincial Javier Tourís, quen destacou que este proxecto supón unha cooperación “non só institucional, senón tamén técnica, científica e estratéxica para o futuro dos territorios”.
Tourís puxo en valor a colaboración entre Galicia e o norte de Portugal para avanzar cara a unha administración “máis eficiente, sostible e innovadora”, capaz de optimizar recursos públicos e reducir o impacto ambiental. Ademais, subliñou que a Deputación está a ser recoñecida pola Unión Europea como un referente en eficiencia enerxética.
O proxecto conta cun orzamento total de máis de 2,5 millóns de euros, dos cales o 75 %, preto de 1,9 millóns, proceden dos fondos FEDER a través do programa Interreg Poctep 2021-2027. A Deputación de Pontevedra xestiona directamente máis de 534.000 euros como entidade líder.
Smart Building-COOP permitirá desenvolver un sistema intelixente de xestión e monitorización enerxética en edificios públicos, baseado en tecnoloxías dixitais avanzadas. A través da integración de sensores IoT, intelixencia artificial e ferramentas de Big Data, buscarase optimizar o consumo enerxético, reducir emisións contaminantes e mellorar a eficiencia das infraestruturas públicas.
A reunión celebrada marca o inicio da coordinación técnica e institucional dun proxecto chamado a converterse nun referente na xestión enerxética intelixente na eurorrexión.
Xunto á Deputación de Pontevedra participan como socios a Deputación de Ourense, o Instituto Tecnolóxico de Galicia e a Universidade de Vigo, pola parte española. Desde Portugal, intégranse a Universidade do Minho, o Instituto Politécnico de Viana do Castelo e a CIM Alto Minho. Ademais, colabora o Instituto Enerxético de Galicia como socio sen financiamento.