Cultura

O museo universitario, que conserva os restos dunha vivenda romana e un templo dedicado a Mitra do século III, recibiu en xaneiro a autorización para trasladar os materiais procedentes de intervencións no antigo Pazo de Montenegro

A Domus do Mitreo de Lugo será o centro de referencia para a custodia dos materiais arqueolóxicos que se recuperen na contorna da cidade. O depósito inclúe pezas procedentes de intervencións realizadas no ámbito do antigo Pazo de Montenegro, que ata agora se conservaban no Museo do Castro.

A Consellería de Cultura, Lingua e Xuventude autorizou o cambio de depósito en xaneiro deste ano. O traslado permite que estes materiais queden baixo a custodia dun centro universitario situado no centro histórico de Lugo e especializado na conservación e difusión do patrimonio arqueolóxico.

A Domus do Mitreo ocupa o edificio e o anexo do antigo Pazo de Montenegro e é de titularidade pública da Universidade de Santiago de Compostela. O museo forma parte do Sistema Galego de Centros Museísticos desde 2025 e está situado nas proximidades da catedral e da porta de Santiago da muralla romana, dous dos principais referentes patrimoniais da cidade.

O espazo alberga os restos dunha casa romana e dun templo dedicado ao deus Mitra, datados no século III despois de Cristo. Tras os traballos de escavación e os estudos arqueolóxicos correspondentes, os vestixios foron acondicionados para a súa exposición pública, que se mantén desde xullo de 2013.

O conselleiro de Cultura, Lingua e Xuventude, José López Campos, destacou a elección deste centro para custodiar os materiais arqueolóxicos durante unha visita ás instalacións. Estivo acompañado polo delegado territorial da Xunta en Lugo, Alfonso Villares, e polo director xeral de Patrimonio Cultural, Ángel Miramontes.