A Feira do Poldro de Muras volveu confirmar o seu poder de convocatoria
A Feira do Poldro e do Gando do Monte de Muras pechou unha nova edición cunha destacada afluencia de público, consolidándose como unha das grandes citas do calendario tradicional e gandeiro da montaña lucense. Centos de persoas achegáronse ata a Gañidoira para gozar dunha xornada que combinou concursos, actividades ecuestres, gastronomía e demostracións de oficios tradicionais.
Desde primeira hora da mañá, o recinto feiral rexistrou un intenso movemento de visitantes e participantes, nun ambiente familiar que se mantivo ao longo de toda a xornada. A exposición de gando e os diferentes certames reuniron máis de 600 exemplares, con premios para as mellores reses e lotes das distintas categorías, ademais dos recoñecementos aos criadores participantes.
O programa incluíu tamén probas hípicas, entre elas o morfolóxico de cabalos de Pura Raza Galega e as carreiras de andadura, que volveron atraer numeroso público ao redor da pista. As competicións puxeron en valor a tradición cabalar dun municipio estreitamente ligado ao mundo ecuestre.
Outro dos grandes atractivos foi a oferta gastronómica, coa degustación da hamburguesa elaborada con carne de poldro de raza autóctona, unha proposta que espertou un notable interese entre os asistentes e que contribuíu a promocionar un dos produtos máis representativos do territorio.
A programación completouse con exhibicións de talla en madeira con motoserra, mostras de artesanía e actividades divulgativas promovidas polas asociacións locais, reforzando o carácter cultural dunha feira que vai máis alá do ámbito gandeiro.
Desde o Concello destacouse o éxito de participación e a capacidade da Feira do Poldro para manter vivas as tradicións do municipio ao tempo que incorpora novas iniciativas destinadas a atraer visitantes de todas as idades, reafirmando o seu papel como un dos eventos de referencia da comarca.