Medio ambiente

Tamén advirte de que a modificación da composición da sala foi substancial e que a falta de explicacións concretas pode proxectar unha imaxe de influencia externa indebida

A Fiscalía Superior de Galicia considera que o traslado forzoso dos maxistrados Luís Villares e María Dolores López López da Sección Terceira da Sala do Contencioso-Administrativo do Tribunal Superior de Xustiza de Galicia (TSXG) non estivo suficientemente xustificado e careceu de criterios obxectivos claros. Así o recolle nun ditame emitido a raíz dun recurso presentado pola CIG contra unha modificación na composición dun tribunal que afectaba a un procedemento xa avanzado na súa tramitación.

O Ministerio Público sostén que a decisión de cambiar a maxistrada relatora dun caso concreto deriva directamente do traslado dos dous xuíces á Sección Cuarta da mesma sala. Segundo a Fiscalía, esta actuación non pode considerarse unha simple cuestión organizativa interna, xa que afecta ao dereito fundamental ao xuíz ordinario predeterminado pola lei.

No seu informe, a Fiscalía apoia a súa argumentación en xurisprudencia do Tribunal Constitucional e do Tribunal Europeo de Dereitos Humanos, que establece que un xuíz non debe ser apartado dos asuntos que ten asignados sen unha motivación adecuada e sen criterios previamente definidos que eviten calquera sospeita de arbitrariedade.

Neste sentido, o ditame sinala que a decisión adoptada presenta unha “ausencia de criterios obxectivos e precisos” e unha “falta de motivación suficiente”, ao considerar que as explicacións ofrecidas foron de carácter xeral e non xustificaron de forma individualizada a necesidade dos traslados para garantir a imparcialidade do tribunal.

A Fiscalía tamén advirte de que a modificación da composición da sala foi substancial e que a falta de explicacións concretas pode proxectar unha imaxe de influencia externa indebida e afectar á confianza da cidadanía no funcionamento da xustiza. Por este motivo, considera que debe estimarse o recurso presentado pola CIG e revogarse a providencia ditada o pasado 19 de maio, de maneira que a maxistrada relatora inicialmente designada continúe á fronte do procedemento ata a súa conclusión, salvo que exista unha causa legal de abstención ou recusación.

Este asunto enmárcase na polémica xerada polos cambios introducidos na sección do TSXG encargada de resolver os recursos relacionados con proxectos eólicos, unha sala que nos últimos anos adoptou decisións que supuxeron a paralización de numerosos parques en Galicia.

Precisamente, a finais de maio a Fiscalía Superior de Galicia remitiu á Fiscalía do Tribunal Supremo as denuncias e a documentación recibida sobre estes cambios. Entre os denunciantes figuran a CIG e a asociación ecoloxista Adega, que cuestionan a legalidade das modificacións realizadas na composición das seccións do contencioso-administrativo do alto tribunal galego e apuntan á posible existencia dun delito de prevaricación. Segundo informaron ambas entidades, a Fiscalía abriu dilixencias de investigación preprocesual para analizar os feitos denunciados.