A folga do metal da Coruña segue no aire á espera dunha nova proposta da patronal
A negociación do convenio do metal da Coruña continúa aberta despois da reunión de mediación celebrada este venres. Segundo trasladou a CIG-Industria, no encontro producíronse avances por primeira vez, ao presentar a patronal propostas concretas que puideron ser valoradas pola parte social.
Con todo, o sindicato considera que as ofertas seguen a ser insuficientes para pechar o conflito e desconvocar as novas xornadas de folga xa previstas para os días 30 de xuño e 2, 7 e 9 de xullo.
A central nacionalista sostén que o movemento da patronal chega despois de oito xornadas de folga secundadas de forma maioritaria polo persoal do sector. Aínda así, advirte de que as propostas empresariais están lonxe dos obxectivos marcados polos traballadores e traballadoras para acadar un convenio digno.
A CIG-Industria reclama á patronal que na reunión do vindeiro luns faga un exercicio de responsabilidade e presente unha proposta que permita alcanzar un acordo. Ese encontro terá lugar antes das asembleas de traballadores convocadas para a tarde dese mesmo día.
O sindicato insiste en que non aceptará un convenio que non recolla as reivindicacións defendidas nas mobilizacións e folgas do sector, e pide á parte empresarial que deixe de centrar o debate en cuestións menores para evitar que o conflito continúe.