A FRUGA chama o sector agrario galego a sumarse á folga xeral do 11 de novembro
A Federación Rural Galega (FRUGA) fai un chamamento ao conxunto do sector agrario galego para sumarse á folga xeral convocada pola Confederación Intersindical Galega (CIG) o vindeiro 11 de novembro e participar nas mobilizacións previstas nas cidades e vilas do país. A organización agraria comparte as razóns da convocatoria e considera que a situación do campo galego reflicte o deterioro das condicións de vida e de traballo que afectan ao conxunto da sociedade.
A FRUGA alerta de que o sector agrario atravesa unha situación crítica polo incremento dos custos de produción nas explotacións, os prezos insuficientes que reciben os produtores polos seus produtos, a falta ou o deterioro dos servizos públicos no rural e a crise da vivenda. A estes problemas súmase o episodio de seca prolongada que está a sufrir Galicia, que agrava as dificultades das explotacións.
Entre as principais demandas da organización figura o cumprimento efectivo da Lei da Cadea Alimentaria por parte das administracións, tanto da Xunta como do Goberno central, para garantir prezos xustos que permitan cubrir os custos de produción. A entidade denuncia que, en moitas ocasións, os prezos actuais nin sequera permiten compensar os gastos que soportan as explotacións.
Outra das reivindicacións diríxese ao Goberno do Estado, ao que reclama a creación dun gasóleo profesional agrícola permanente, cunha fiscalidade realmente reducida e aplicada no momento da subministración. A FRUGA considera insuficientes as medidas temporais que se adoptan para responder ás subidas dos combustibles e defende que o sector precisa unha solución estable.
No ámbito autonómico, a organización solicita á Xunta de Galicia medidas para facer fronte á seca prolongada, tanto a través dunha liña de axudas que permita responder ás necesidades máis inmediatas como mediante actuacións estruturais para afrontar os efectos do cambio climático.
Máis servizos públicos e vivenda para manter vivo o rural
A FRUGA reclama tamén ao Goberno galego que deteña o que cualifica de desmantelamento dos servizos públicos e reforce os investimentos no rural en ámbitos como a educación, a sanidade e a atención ás persoas maiores e dependentes. Xunto a isto, considera necesario desenvolver un plan de recuperación e dotación de vivendas que permita garantir unhas condicións de vida plenas e dignas no medio rural.
A organización apunta igualmente á necesidade de que a Consellería do Medio Rural dispoña dun orzamento suficiente para apoiar e desenvolver o sector agrario galego. Reclámalle, ademais, que abandone a súa inacción ante os problemas que afectan aos profesionais e que escoite as demandas das organizacións agrarias e das persoas que traballan no campo.
No ámbito da política agraria europea, a FRUGA chama a opoñerse á desaparición da Política Agraria Común (PAC) como política diferenciada e á redución dos seus fondos. A entidade defende o mantemento dos dous piares da PAC e a capacidade de Galicia para decidir sobre a súa organización e as prioridades de gasto.
Tamén expresa o seu rexeitamento á competencia desleal que, ao seu xuízo, poden provocar tratados comerciais internacionais como o de Mercosur, ao considerar que afectan negativamente á capacidade produtiva propia.
Con este conxunto de reivindicacións, a Federación Rural Galega anima o sector agrario a participar nas mobilizacións convocadas pola CIG o 11 de novembro nas cidades e vilas galegas. A organización entende que a defensa dun rural vivo pasa por garantir prezos xustos para as producións, apoiar as explotacións e asegurar servizos públicos e condicións de vida dignas para a poboación.