Rural

A organización agraria advirte de que as explotacións lácteas afrontan unha situación “moi crítica” polo descenso duns oito céntimos por litro, o incremento dos custos de produción e os efectos da seca sobre as colleitas forraxeiras

A Federación Rural Galega (FRUGA) reclama á Xunta de Galicia que adopte medidas ante a nova baixada dos prezos do leite que está a afectar as explotacións galegas. Segundo denuncia a organización, esta última redución sitúase en torno aos oito céntimos por litro, aínda que varía en función das distintas industrias recolledoras, e está a provocar unha importante caída dos ingresos das ganderías nun contexto marcado polo incremento dos custos de produción.

FRUGA sinala que a subida do prezo dos carburantes está a repercutir directamente nos gastos das explotacións, no custo dos fertilizantes e doutros insumos e nos contratos con empresas de servizos. A esta situación engádense os efectos da seca extrema deste verán, que está a reducir as principais colleitas forraxeiras e a poñer en risco o abastecemento de alimentación para os próximos meses. A organización considera que a combinación destes factores sitúa o sector leiteiro galego nunha situación especialmente delicada.

A entidade agraria tamén denuncia que Galicia mantén actualmente os prezos por litro de leite máis baixos do Estado español e asegura que esta diferenza non é puntual, senón que se mantén desde 2010. FRUGA lembra que anos atrás as explotacións galegas chegaron a percibir prezos superiores aos doutras comunidades, especialmente entre 2007 e 2009, cando, segundo a organización, desde a Xunta se desenvolveron outras políticas agrarias.

Entre as causas da situación actual, FRUGA sinala a desaparición da Mesa do Leite, que ao seu xuízo permite que a industria e a distribución fixen os prezos de maneira unilateral. Tamén cuestiona a aplicación da Lei da Cadea Alimentaria, que considera que non está a ter efectos prácticos para garantir prezos que cubran os custos de produción das explotacións.

A organización considera ademais que outro dos problemas estruturais do sector é a falta dunha industria de base cooperativa que permita constituír un verdadeiro grupo lácteo galego. Segundo FRUGA, esta estrutura daría ás ganderías maior capacidade de negociación á hora de establecer un prezo para o leite que consideran digno.

A federación critica igualmente a actuación dos gobernos autonómicos anteriores e do actual Executivo galego. Na súa opinión, as decisións adoptadas nos últimos anos polos gobernos de Feijóo e Rueda foron “totalmente contraproducentes” para mellorar as condicións das explotacións lácteas.

Sobre as próximas renovacións dos contratos, FRUGA apunta que as industrias están a falar de posibles incrementos de dous céntimos por litro. A organización considera que estas subas serían insuficientes e cuestiona novamente que sexan as industrias as que tomen decisións de maneira unilateral. Ademais, relaciona a evolución dos prezos coas previsións de descenso da produción láctea tanto no Estado como no conxunto de Europa debido aos efectos da seca deste verán.

Ante esta situación, FRUGA reclama á Xunta que utilice os mecanismos dos que dispón para favorecer unha recuperación dos prezos acorde coa actual situación do sector. Entre as medidas que considera necesarias sitúa a convocatoria da Mesa do Leite e a adopción de medidas para evitar que a gran distribución actúe de maneira unilateral, co apoio das industrias, en detrimento da rendibilidade e da viabilidade das explotacións leiteiras galegas.