A Fundación Yosso-Xosé de Valbuxán, no Bolo, obtén a declaración oficial de interese galego
A Fundación Yosso-Xosé de Valbuxán, con sede no municipio ourensán do Bolo, conta xa co recoñecemento oficial como entidade de interese galego tras a publicación no Diario Oficial de Galicia (DOG) da resolución da Secretaría Xeral Técnica da Consellería de Cultura, Lingua e Xuventude.
A fundación naceu en marzo de 2026 co propósito de manter viva e divulgar a obra de José Porto García, coñecido artisticamente como Xosé de Valbuxán-Yosso, poeta e pintor falecido en 2019. A súa produción artística está actualmente reunida e exposta no Museo de Yosso, situado no Bolo.
A entidade está presidida por Mariña Porto García, irmá do artista, e desenvolverá a súa actividade arredor da protección e promoción do patrimonio cultural e social ligado á súa figura. Entre os seus fins tamén se atopa impulsar o uso da lingua galega como vehículo das súas propostas e actividades culturais.
Outro dos obxectivos da fundación é contribuír ao desenvolvemento da comarca de Valdeorras e ao seu enriquecemento cultural e artístico, especialmente nos ámbitos nos que destacou Xosé de Valbuxán-Yosso ao longo da súa traxectoria.
A institución iniciou os trámites administrativos en abril deste ano, cando presentou a solicitude de clasificación, declaración de interese galego e inscrición no Rexistro de Fundacións de Interese Galego. Previamente, o 21 de agosto, a Consellería de Presidencia, Xustiza e Deportes acordara a súa clasificación como entidade de interese cultural.