A insuficiencia cardíaca centra un encontro que reunirá en setembro a expertos internacionais en A Coruña
A Coruña converterase esta semana nun punto de encontro para especialistas en insuficiencia cardíaca coa celebración da XIII Reunión Estado da Arte en Práctica Clínica e Modelos Organizativos, que terá lugar os días 25 e 26 de setembro. O encontro está organizado pola Unidade de Insuficiencia Cardíaca e Transplante Cardíaco do Complexo Hospitalario Universitario da Coruña (CHUAC) e reunirá profesionais de referencia no ámbito da cardioloxía.
O programa científico abordará os principais avances no diagnóstico e tratamento da insuficiencia cardíaca, así como novas estratexias para mellorar a atención aos pacientes. As sesións estarán dirixidas a cardiólogos, internistas, médicos de urxencias, intensivistas, especialistas en imaxe cardíaca e outros profesionais implicados no tratamento desta enfermidade.
A reunión contará cunha ampla representación de especialistas galegos, con participación de profesionais dos hospitais de Santiago, Vigo, Pontevedra, Ourense, Ferrol e Lugo, ademais dos especialistas do propio CHUAC.
Novas terapias e dispositivos cardíacos
Entre os asuntos que se analizarán estará o programa DIRECT-HF, centrado no papel dos dispositivos cardíacos implantables no tratamento da insuficiencia cardíaca. A terapia de resincronización cardíaca e os desfibriladores automáticos implantables permiten actuar sobre a actividade eléctrica e mecánica do corazón e poden contribuír a reducir hospitalizacións e o risco de morte súbita en pacientes seleccionados.
O encontro tamén analizará como mellorar a selección dos pacientes que poden beneficiarse destes dispositivos e a súa programación, buscando adaptar o tratamento ás características clínicas de cada persoa.
Outro dos bloques estará dedicado á amiloidose cardíaca por transtiretina (ATTR), unha enfermidade que nos últimos anos experimentou importantes avances no seu diagnóstico e tratamento.
A dispoñibilidade de diferentes alternativas terapéuticas, entre elas tafamidis, acoramidis e vutrisiran, permite actuar sobre distintos mecanismos relacionados coa enfermidade. Os especialistas analizarán a evolución destes tratamentos e a importancia de detectar a patoloxía de maneira temperá, antes de que o dano cardíaco avance.
O reto do shock cardioxénico en Galicia
Unha das sesións especiais estará dedicada á situación da atención ao shock cardioxénico en Galicia, utilizando os datos do Rexistro Galego de Shock Cardiogénico (CoSCa), coordinado polo doutor Miguel Solla, do CHUAC.
Neste ámbito, o Complexo Hospitalario Universitario da Coruña ten un papel de referencia ao ser o único centro de transplante cardíaco de Galicia e recibir os casos de maior complexidade.
O modelo de atención baséase nunha organización en rede na que o CHUAC exerce como centro coordinador e mantén a colaboración co resto de hospitais e áreas sanitarias galegas. O obxectivo é facilitar que os pacientes que sufran un shock cardioxénico poidan acceder con rapidez ás técnicas de soporte circulatorio e, cando sexa necesario, ao transplante cardíaco.
A reunión está coordinada cientificamente pola doutora Marisa Crespo Leiro e os doutores José Manuel Vázquez Rodríguez e José Joaquín Cuenca Castillo e combinará actualización científica, debate entre especialistas e presentación de casos clínicos.