A investigadora Carlota Ucha demostra o potencial do aceite de cociña usado para producir bioplásticos
A investigadora da Universidade de Santiago de Compostela Carlota Ucha Muñoz demostrou nun estudo desenvolvido no Centro de Investigación Interdisciplinaria en Tecnoloxías Ambientais (CRETUS) que o aceite de cociña usado pode converterse nun recurso útil para a produción de bioplásticos biodegradables.
O traballo, realizado no marco da súa tese de doutoramento e dirixido por Anuska Mosquera Corral e Ángeles Val del Río, do grupo Biogroup da USC, analizou a viabilidade de transformar este residuo en PHA, un tipo de polímero de orixe biolóxica e biodegradable que pode empregarse como alternativa aos plásticos convencionais.
A investigación centrouse no desenvolvemento dun bioproceso no que distintas bacterias utilizan o aceite de cociña usado como fonte de alimentación para sintetizar estes materiais. Para iso empregáronse diferentes reactores biolóxicos e avaliáronse distintas condicións de funcionamento tanto a escala de laboratorio como piloto.
Segundo explica Carlota Ucha, a recollida selectiva obrigatoria deste residuo, implantada en España desde 2024 en cumprimento da normativa europea, converte o aceite de cociña usado nun material especialmente axeitado para a súa valorización, ao estar controladas a súa procedencia e calidade.
Os resultados obtidos apuntan á posibilidade de reducir dous problemas ambientais ao mesmo tempo: a xestión dun residuo complexo e a elevada produción de plásticos convencionais.
A investigación desenvolveuse no CRETUS, centro da rede CIGUS financiado con fondos europeos, no marco do proxecto Ecopolyver, no que tamén participa o Instituto da Auga da Universidade de Granada.