A primeira fábrica de chips fotónicos de España comezará a funcionar en Vigo en 2027
Vigo acollerá a primeira fábrica de chips fotónicos de España, que comezará a funcionar en 2027 no Parque Tecnolóxico de Valladares. Este venres tivo lugar o acto de colocación da primeira pedra da planta de fabricación de semiconductores fotónicos do proxecto Sparc, un fito industrial que xerará arredor de 750 postos de traballo entre emprego directo e indirecto.
O acto estivo presidido polo ministro para a Transformación Dixital e da Función Pública, Óscar López, polo alcalde de Vigo e presidente do Consorcio da Zona Franca, Abel Caballero, polo delegado do Consorcio, David Regades, e pola primeira tenente de alcalde, Carmela Silva, xunto a outras autoridades institucionais e académicas.
Durante a súa intervención, Abel Caballero subliñou a transcendencia do proxecto ao asegurar que “seguramente é o máis importante de toda a historia de Vigo pola altísima tecnoloxía que se producirá aquí”. O rexedor destacou que a planta marcará “o futuro tecnolóxico de Vigo, de Galicia e de toda España”, e amosou o seu convencemento de que “o mundo enteiro vai participar do que suceda aquí”.
Caballero lembrou que, nun contexto no que Europa apostou por países como Francia e Alemaña, Vigo decidiu dar un paso adiante. “Vigo dixo: aquí estamos”, afirmou, destacando tamén o crecemento económico rexistrado nos últimos anos e o papel clave da tecnoloxía, da Universidade de Vigo, da Zona Franca e do Goberno de España no impulso do proxecto.
Pola súa banda, o ministro Óscar López destacou que sen o impulso do alcalde “non sería posible o proxecto da planta de semiconductores” e asegurou que Sparc “fará de Vigo unha das xoias da coroa da revolución dixital española”. Segundo explicou, esta iniciativa integra a España na cadea europea de produción de chips de última xeración, un ámbito estratéxico para a soberanía tecnolóxica nacional e comunitaria.
López salientou que Europa produce actualmente menos do 10% dos semiconductores a nivel mundial e que Sparc contribuirá a reducir este déficit, cunha capacidade inicial de produción de 1.500 obleas ao ano, ampliable até as 20.000. “Vigo será sinónimo de fotónica europea nun momento clave de competencia xeopolítica polas novas tecnoloxías”, afirmou.
A primeira tenente de alcalde, Carmela Silva, puxo en valor o inicio dunha iniciativa industrial que materializa “a aposta polo futuro tecnolóxico do noso país” e reforza o ecosistema de semiconductores desde Vigo. Destacou que se trata dunha industria de alto valor engadido, “de tecnoloxía punta e cun impacto ambiental mínimo”, e salientou o papel da Universidade de Vigo como motor de transferencia de coñecemento e creación de industria.
O Goberno de España participa neste proxecto a través da Sociedade Española para a Transformación Tecnolóxica (SETT), cun investimento de 17,2 millóns de euros. Ademais dos preto de 200 empregos directos de alta cualificación, estímase a creación duns 550 postos de traballo indirectos asociados á nova planta.