A Rede Cultural da Deputación da Coruña levará espectáculos a 199 entidades cunha achega provincial de case medio millón de euros
A Deputación da Coruña vén de aprobar unha nova fase de adxudicación de espectáculos da Rede Cultural, centrada nesta ocasión nas actividades contratadas por entidades culturais sen ánimo de lucro e prestadas por grupos non profesionais dentro do programa Alicerce. A resolución beneficiará a 199 entidades da provincia e contará cun investimento global que supera os 462.000 euros.
A institución provincial asumirá o 55 % do custo dos cachés de cada unha das funcións solicitadas, co obxectivo de facilitar que asociacións e colectivos poidan organizar programacións culturais nos seus municipios durante os vindeiros meses. A iniciativa permitirá levar propostas de música, teatro, danza, maxia e outras disciplinas a diferentes localidades, con especial atención aos espazos fóra dos grandes núcleos urbanos.
A deputada de Cultura, Natividade González, destacou o impacto desta liña de apoio ao chegar a case dous centos de asociacións e colectivos veciñais, aos que definiu como unha peza fundamental para a vertebración social e cultural da provincia. Segundo sinalou, a participación de 199 entidades demostra a vitalidade do tecido asociativo e a súa capacidade para descentralizar a actividade cultural.
A convocatoria incorpora este ano unha novidade administrativa. A publicación da resolución no Boletín Oficial da Provincia terá carácter contractual, polo que non será necesario asinar un convenio individual con cada entidade e grupo participante. Con esta medida, a Deputación busca simplificar e axilizar o procedemento.
Esta resolución súmase á aprobada no mes de abril, correspondente ás adxudicacións de espectáculos para os 93 concellos da provincia, cun importe de 1,57 millóns de euros. En total, a Rede Cultural mobiliza este ano 2,03 millóns de euros, consolidándose como o principal programa de apoio á cultura da Deputación.
O programa ten unha dobre finalidade: facilitar que concellos e asociacións poidan organizar actividades culturais en todo o territorio e garantir unha achega económica directa a creadores, compañías e artistas. A cidadanía poderá consultar o calendario completo, coas datas, lugares e artistas participantes, a través da web oficial redecultural.gal e da aplicación para dispositivos móbiles.