A rede provincial de estradas de Pontevedra aumentou o seu tráfico un 3 %, con 1.200 tránsitos ao día
O presidente da Deputación de Pontevedra, Luis López, presenta os resultados da memoria anual de aforos correspondente ao ano 2025 da rede de estradas provinciais co aumento nun 3% do número de usuarios da rede viaria provincial con respecto ao ano anterior. O mandatario provincial explicou que a maior densidade de tráfico dos 1.600 quilómetros da rede de estradas provinciais concéntrase na franxa atlántica, especialmente na contorna de Vigo, Mos e O Porriño, pero tamén en treitos da cidade de Pontevedra e da comarca de Arousa.
“Medimos os tráficos en 98 treitos de estradas de todos os concellos da provincia e unha das principais conclusións é que os tráficos experimentaron un ascenso de case o 3% este ano. Isto significa unha media de 33 vehículos máis ao día que se desprazan pola rede de estradas provinciais con respecto ao ano 2024 e o resultado deste informe revela que, de media, 1.027 vehículos circulan polas estradas da Deputación cada día, dos que 35 son pesados”, detallou o dirixente provincial.
Os treitos que presentan un maior fluxo de tráfico sitúanse no termo municipal de Vigo, sendo a estrada provincial EP-2605 a máis empregada con 9.356 condutores que transitan cada día entre o Hospital Meixoeiro e a EP-2605. Tamén en Vigo, sobresae o treito da EP-2001 comprendido entre a estrada Clara Campoamor e a A Garrida con 8.559 tránsitos diarios, mentres que o espazo da EP-2001 entre O Calvario e a A-55 o completan cada día 7.819 vehículos.
Nos municipios de Mos e O Porriño tamén se concentra un elevado número de desprazamentos. É o caso da estrada entre Puxeiros e Peinador, en Mos, con 8.568 movementos ao día; o do viario de Peinador a Louredo; con 7.337; ou o de Puxeiros ao Meixoeiro e ao Cuvi, con 6.882. A EP-2401, entre O Porriño e a rúa Ribeira, concentra cada día 8.220 vehículos; e a EP-2201 entre Baiona, Bahíña e Fontes rexistrou 6.127 mobilidades.
Na cidade de Pontevedra, a EP-0002 entre O Marco e Tomeza é a máis transitada da rede provincial que cruza a capital con case 5.000 vehículos cada día. Mentres que na comarca de Arousa o récord está no termo municipal da Illa de Arousa, na EP-9801 entre Ponte e Laxes con 6.507 movementos.
“As grandes estradas e as autoestradas conectan cidades, as provinciais conectan fogares”, reflexionou o presidente para reafirmar o compromiso da Deputación coa mellora das estradas, que volverán contar cunha ampla partida orzamentaria no vindeiro ano 2027, que se complementa co apoio aos concellos a través de plans como o +Provincia ou o Vía Depo. Neste sentido, reclamou o dirixente provincial o mesmo nivel de compromiso ao Goberno central para a mellora da rede de estradas nacionais que atravesan a provincia.