A UVigo e o Concello de Pontevedra crean unha cátedra para impulsar unha cidade máis activa e saudable
A Universidade de Vigo e o Concello de Pontevedra puxeron en marcha a Cátedra PonteActiva, unha iniciativa á que a administración local destinará 120.000 euros durante catro anos, entre 2026 e 2029. O obxectivo é promover a actividade física como ferramenta para mellorar a saúde e a calidade de vida da cidadanía.
O convenio foi asinado este mércores pola reitora da UVigo, Carmen García Mateo, e o alcalde de Pontevedra, Miguel Anxo Fernández Lores. A cátedra estará dirixida polo catedrático José María Cancela e buscará facilitar o acceso da poboación a programas de exercicio adaptados ás necesidades de cada colectivo, con especial atención ás persoas sedentarias, con patoloxías ou con dificultades para manter hábitos activos.
Entre as actuacións previstas figuran o fomento do envellecemento activo e a promoción da actividade física entre a infancia e a mocidade. Ademais, a iniciativa pretende establecer colaboracións co ámbito sanitario para avanzar na prescrición de exercicio físico como parte dos coidados de saúde.
O proxecto desenvolverase por fases. En 2026 arrancará cun programa piloto e unhas xornadas científicas sobre actividade física, xénero e espazo público. Nos anos seguintes incorporarase o traballo con novos colectivos, como as persoas con discapacidade, e impulsarase a creación dun laboratorio de innovación en exercicio físico comunitario, que aspira a ser pioneiro en España.
A iniciativa permitirá tamén trasladar á sociedade o coñecemento científico e investigador da Universidade de Vigo, poñéndoo ao servizo das políticas municipais de saúde, deporte e benestar.