A Veiga Rock IX reunirá en Vegadeo unha noite de stoner, punk, folk e metal con entrada gratuíta
Vegadeo volverá converterse este verán nun punto de encontro para os amantes da música alternativa coa celebración dunha nova edición do A Veiga Rock. O festival confirmou xa o cartel completo da súa novena edición, que terá lugar o sábado 1 de agosto de 2026 no recinto feiral da localidade asturiana.
A organización aposta unha vez máis por unha programación marcada pola variedade de estilos e pola presenza de bandas de diferentes escenas musicais. O público poderá gozar dunha noite na que haberá espazo para o stoner, o punk, o folk, o hardcore, o metal e mesmo sons máis mesturados con ritmos de cumbia.
O cartel estará encabezado por El Reno Renardo, banda coñecida polo seu estilo irreverente e pola mestura de humor e metal nas súas cancións. Xunto a eles actuarán tamén Amarradizo, Onza e True Mountains, completando unha proposta que busca atraer tanto ao público habitual do festival como a novas xeracións de afeccionados á música en directo.
Os concertos comezarán ás 21:00 horas e a entrada será totalmente gratuíta, mantendo así unha das sinais de identidade dun evento que foi consolidándose co paso dos anos no calendario musical do verán no occidente asturiano.
Desde a organización destacan ademais o ambiente que rodea cada edición do festival e animan ao público a reservar xa a data para unha cita que, segundo sinalan, “quen vén, sempre repite”.