A voz dos alcaldes: Dani Vega, alcalde de Ribadeo
Explíquenos un pouco como se iniciou na política.
Comecei na política cando o Partido Popular perdeu as eleccións en Ribadeo, da man de José Carlos Rodríguez Andina e Manolo Valín. Foi entón cando comecei a traballar con eles desde a oposición. Pouco despois fun elixido presidente provincial de Novas Xeracións e asumín responsabilidades na organización con Barreiro e Balseiro, ademais de ocupar cargos na dirección autonómica. Antes traballaba como técnico agrícola, unha profesión que exercín entre 2009 e 2016. Durante un tempo fun compaxinando as dúas facetas, ata que finalmente me centrei máis na política.
A nivel persoal, que sacrificios supón formar parte do Goberno do Concello?
O sacrificio é importante porque ser alcalde non é un traballo dunhas horas ao día e despois desconectas. É unha responsabilidade as 24 horas, os sete días da semana. Hai que estar dispoñible todos os días e, ademais, é un traballo de proximidade, de estar ao lado da xente, escoitar os problemas e atender as necesidades que van xurdindo.
E que beneficios lle aporta?
O principal beneficio, ademais de estar preto da xente, dos teus amigos, veciños e familiares da vila, é poder facer melloras por e para todo o pobo. Somos actores principais do cambio e temos a oportunidade de impulsar actuacións que repercuten directamente na vida dos veciños.
Cales son os seus obxectivos a nivel político?
Nestes momentos estamos no Goberno local e os meus obxectivos, que son tamén os do equipo, pasan por seguir pelexando por Ribadeo. Non teño a cabeza posta en ningún outro sitio que non sexa aquí.
E como afronta o Goberno a próxima lexislatura?
Con moitos investimentos e obras de mellora e, polo tanto, con moita ilusión. Temos un goberno activo e dinámico, levámonos moi ben e traballamos unidos. Esa coordinación é importante para poder continuar desenvolvendo os proxectos que temos en marcha.
Está a favor dos pactos de Goberno?
Depende. Son unha persoa partidaria do entendemento e de construír. Para min sempre debe primar o interese xeral. Trabállase polo pobo e, cando se trata de conseguir avances para os veciños, as ideoloxías deben quedar á parte.
Cales son as principais liñas do seu programa?
As liñas marcámolas en 2023 e seguimos con elas porque son os nosos piares. Planificouse moita obra que xa se está vendo e hai outra que aínda non puido comezar, porque todo require os seus tempos. Unha prioridade fundamental é o abastecemento de auga. Nesta lexislatura comezamos as obras para renovar a tubaxe e mellorar a xestión diaria de todo o ciclo da auga. A isto súmase o saneamento e os investimentos en infraestruturas a través do Plan Avanza Rural, tanto nas vías principais como nas pistas de concentración de terra e nas pistas forestais.
Tamén queremos seguir mellorando servizos e equipamentos: a accesibilidade do centro de saúde, as instalacións municipais, a nova oficina de turismo na Casa Maseda ou completar as obras do Hospital Asilo. A planificación inclúe actuacións en vías e rúas como a avenida de Buenos Aires, rúa Reinante, avenida de México ou Os Galos.
Hai tamén actuacións na iluminación de Rosalía de Castro, avenida de Galicia e avenida de Asturias, ademais do novo miradoiro de Santa Cruz. Queremos mellorar a zona portuaria e o Cargadoiro e rehabilitar a capela da Virxe do Camiño para convertela nunha sala cultural. Estamos cumprindo o programa e seguindo un guión, aínda que é evidente que un proxecto desta dimensión non pode completarse só en catro anos.
Cales considera que son as principais necesidades de Ribadeo?
Destacaría o abastecemento de auga, o centro de saúde, a residencia Hospital Asilo e o Plan Vive Ribadeo, que é único na provincia. No ámbito deportivo tamén está o campo de herba artificial. Podería estar xa feito do Goberno anterior, pero nos tivemos que priorizar investimentos.
De que proxectos se sente máis orgulloso?
Especialmente do abastecemento de auga, porque é un problema que afecta a moitos concellos. Temos episodios de seca, pero tamén debemos mellorar a xestión. Por exemplo, desde Vilarbetote ata Ribadeo estábase perdendo arredor dun 20 % da auga, polo que esta obra era moi necesaria. Tamén me sinto moi orgulloso dos proxectos sociais, como a contratación dunha persoa con síndrome de Down, estou orgullosísimo de que forme parte do noso equipo. Outra actuación importante é a mellora da accesibilidade na praia dos Bloques.
Que lle gustaría que os veciños visen en vostede como alcalde?
Sobre todo, unha boa persoa e unha persoa próxima.
Como é a relación coa oposición?
É boa.
EN CLAVE PERSOAL
- Idade, estado civil e familiar.
42 anos e con parella. - Profesión e formación.
Técnico agrícola. - Que quería ser de cativo?
Gandeiro, pois tiñamos unha gandaría de Frisón de leite. - Que fai para desconectar?
Nunca desconecto de todo. - Unha virtude e un defecto.
Creo que son moi traballador, pero tamén chega a ser unha obsesión. - Un consello para compartir.
Na vida hai que ter honradez, lealdade e ser traballador. - Un libro.
‘La reforma social’, de Eduardo Dato. - Unha película.
Prefiro escoitar a radio. - Un grupo de música.
Milladoiro, Luar na Lubre ou Coldplay. - Unha afección.
Estar na miña casa e desfrutar do campo. - Un lugar que visitar.
A Ribeira Sacra, a Terra Chá, Santiago de Compostela ou Bruxas. - Unha comida e unha bebida.
Un bo cocido e unha Estrella Galicia 0,0 Tostada. - Unha personaxe admirada.
Admiro o labor que fixeron Fraga, Cánovas del Castillo e María Teresa de Calcuta. - Unha posesión prezada.
A miña casa e a miña familia. - Un desexo.
Que Ribadeo siga avanzando. - Que é o que máis valora nunha persoa?
Como dixen antes, a honradez e a lealdade. - Equilibra ben a vida pública e a privada?
Convivo con ambas como podo. - Usa redes sociais e WhatsApp?
Si, ambas. Son boas ferramentas. - Un desafío pendente.
Seguir traballando por e para Ribadeo. - Onde se ve en cinco anos?
Espero que en Ribadeo.