A Xunta abre o prazo para inscribirse na Residencia Literaria da Illa de San Simón
A Xunta de Galicia abre mañá o prazo para optar a unha das 24 prazas dispoñibles na Residencia Literaria da Illa de San Simón, unha iniciativa da Consellería de Cultura, Lingua e Xuventude que busca apoiar a creación literaria en lingua galega. A finalidade é ofrecer un espazo, ambiente e condicións óptimas para a plena dedicación aos proxectos creativos.
Tras o éxito das dúas primeiras edicións, o Goberno galego dá continuidade a esta proposta, coa posibilidade de realizar estadías en tres quendas: do 19 de maio ao 1 de xuño, do 23 de setembro ao 6 de outubro e do 6 ao 19 de outubro. As estadías deberán ter unha duración mínima dunha semana e máxima dunha quincena.
Poderán participar persoas maiores de idade que estean a desenvolver un proxecto literario en galego. Durante a súa estancia na Illa de San Simón, os creadores disporán de aloxamento e espazo de traballo, así como dos servizos necesarios para avanzar no seu traballo.
As solicitudes poderán presentarse ata o 25 de abril a través da sede electrónica da Xunta. Cada persoa só poderá presentar unha candidatura acompañada dun documento de ata 10 páxinas co detalle do proxecto, o xénero, o idioma, o currículo, o expediente artístico e unha carta de motivación.
Esta residencia insírese dentro das políticas da Consellería para fomentar a lectura e apoiar o libro galego, e forma parte dun conxunto de actuacións ás que se destinan 3 millóns de euros, entre as que tamén se inclúen liñas de axuda á edición, distribución e participación en eventos fóra de Galicia.