A Xunta adxudica por 37,7 millóns o último treito da AG-22 entre Lugo e Sarria
A Xunta de Galicia adxudicou á empresa Copasa Infraestructuras as obras do segundo e último tramo da autovía AG-22, que conectará Lugo e Sarria, cun investimento de 37,7 millóns de euros. O contrato permitirá acometer o desdobramento do tramo comprendido entre Nadela e A Pobra de San Xiao, cun prazo de execución previsto de 36 meses.
A intervención desenvolverase ao longo de 13,5 quilómetros, desde a glorieta de Nadela ata o enlace da Pobra de San Xiao, que xa se atopa en servizo. Entre as actuacións máis destacadas figuran os enlaces do Corgo e Maceda, un cruzamento inferior baixo a autovía A-54, a construción de dous viadutos sobre os ríos Chamoso e Neira, así como a ampliación de 13 pasos superiores e sete inferiores.
A conversión do actual corredor nunha vía de alta capacidade permitirá mellorar notablemente a seguridade e a fluidez da circulación, ao contar con dúas calzadas e dous carrís por sentido. Ademais de facilitar os adiantamentos sen risco, a nova infraestrutura ofrecerá unha condución máis cómoda e previsible, reducindo os tempos de desprazamento entre Lugo e a comarca de Sarria.
A actuación tamén reforzará a conexión cos principais eixes viarios do territorio, especialmente coa A-6 e a A-54, que conflúen no nó de Nadela. Segundo as previsións, arredor de 100.000 usuarios beneficiaranse desta infraestrutura, pola que se estima que circularán máis de 8.000 vehículos diarios, incluídos numerosos transportistas. A velocidade máxima estará limitada a 120 quilómetros por hora.