A Xunta conclúe a rehabilitación do treito da Muralla afectado polos temporais
A Xunta de Galicia puxo en servizo o novo pavimento do adarve da Muralla de Lugo no tramo situado á altura da rúa do Moucho, unha actuación que permitirá comprobar a resistencia, eficacia e adecuación desta solución antes da súa posible implantación noutros puntos do monumento.
O delegado territorial da Xunta en Lugo, Alfonso Villares, visitou a zona coincidindo coa retirada das valas e da pasarela provisional que facilitou o tránsito de peóns durante o proceso de fraguado do novo material.
Villares explicou que esta intervención supón a culminación da rehabilitación do treito da Muralla que en febreiro sufriu o derrubamento do paramento interior como consecuencia dos fortes temporais. Os traballos de reconstrución executáronse nun prazo aproximado dun mes e contaron cun investimento próximo aos 200.000 euros. Ademais, aproveitouse a actuación para incorporar unha medida complementaria destinada a ampliar os ensaios de novos acabados superficiais, que xa se iniciaran anteriormente no cubo XVIII.
O delegado destacou que as filtracións de humidade constitúen un dos principais problemas de conservación do monumento e lembrou que este foi precisamente un dos factores que contribuíu ao deterioro da zona afectada. Neste sentido, sinalou que todas as solucións que se están a analizar incorporan unha capa impermeable que contribuiría a reducir a entrada de auga. Non obstante, indicou que tamén é necesario avaliar outros aspectos, como a súa funcionalidade e adaptación ao uso diario da cidadanía.
Na actualidade están a probarse catro tipos distintos de acabados superficiais no adarve, empregando técnicas construtivas e materiais inspirados nos utilizados durante a época romana. Entre eles destacan a area, a cal e diferentes fragmentos de lousa ou arxila.
A nova superficie incorporada abrangue arredor de seis metros cúbicos, cunha lonxitude superior aos 10 metros e ocupando toda a anchura do adarve. Esta solución toma como referencia unha das tres mesturas aplicadas previamente nas proximidades da Porta Miñá, aínda que incorpora unha maior proporción de pequenos fragmentos de tella.
Por outra banda, a Consellería de Cultura, Lingua e Xuventude ten previsto destinar un investimento de 1 millón de euros durante o bienio 2026-2027 para desenvolver distintas actuacións incluídas no Plan de Conservación e Xestión da Muralla de Lugo.