A Xunta e a Deputación de Ourense destacan o labor de ATAVE na formación e no apoio aos talleres de automoción
O conselleiro de Emprego, Comercio e Emigración, José González, e o presidente da Deputación de Ourense, Luis Menor, destacaron o papel da Asociación Provincial de Talleres de Reparación de Vehículos de Ourense (ATAVE) no apoio ás empresas da automoción, na formación de profesionais e na adaptación dos negocios ás novas necesidades do mercado laboral.
José González participou o 16 de outubro no encontro anual de confraternización da entidade, acompañado polo delegado territorial da Xunta en Ourense, Manuel Pardo. Durante o acto, puxo en valor o labor de ATAVE a prol dunha formación flexible e adaptada ás necesidades dos talleres, así como a súa contribución á defensa dos profesionais do sector.
O conselleiro salientou a importancia da colaboración entre as administracións públicas e o tecido empresarial para afrontar retos como a cobertura de vacantes, a cualificación das persoas traballadoras e a captación de talento. Neste sentido, apuntou á necesidade de ofrecer formación tanto ás persoas ocupadas como ás desempregadas, ao tempo que se favorece o regreso de galegos residentes no exterior e a incorporación de traballadores doutros países.
No ámbito do benestar laboral, González referiuse ao plan integral acordado no marco do Diálogo Social e aprobado en setembro polo Consello da Xunta. Esta iniciativa busca reforzar a prevención, mellorar as condicións laborais e favorecer unha reincorporación saudable tras unha baixa. Segundo explicou, o plan presta especial atención ás pequenas e medianas empresas, como as que integran ATAVE, mediante instrumentos de apoio e asesoramento.
O responsable autonómico agradeceu tamén a contribución dos profesionais recentemente xubilados que recibiron unha homenaxe durante o encontro. Ademais, lembrou o piloto ourensán de automobilismo Xesús López Fernández, coñecido como Pijo, falecido nun accidente en agosto.
ATAVE reúne máis de 400 talleres e concesionarios
Pola súa banda, o presidente da Deputación de Ourense, Luis Menor, participou na asemblea anual de ATAVE, presidida por Ricardo Borrajo, na que destacou o labor da asociación no asesoramento aos negocios da automoción e na formación técnica de profesionais.
Fundada en 1977 por 33 empresarios, a entidade agrupa actualmente máis de 400 talleres e concesionarios, que representan o 90 % dos profesionais do sector na provincia, con presenza en todas as comarcas.
Menor puxo en valor o traballo da asociación para acompañar os pequenos negocios ante os cambios normativos e os retos derivados da electrificación dos vehículos. Tamén destacou a actividade do seu Centro de Formación, que ofrece cualificación técnica a mozos desempregados e contribúe a dar resposta ás necesidades de persoal das empresas.
O acto concluíu coa entrega de placas conmemorativas a distintos membros homenaxeados da asociación. O presidente provincial foi o encargado de entregar os recoñecementos a Carlos Iglesias Camba, Manuel García Camba e Antonio Iglesias Santás.